Hripui vei enkawl mek an tlem tial tial

September 25, Pathianni khan Mizoramah Covid-19 vei mi pakua hmuh chhuah a ni a, September thlaah mi 10 aia tlem hmuh chhuah ni thumna a ni. Nimin khan hripui vei dam tawh mi 29 chhuahtir niin, thi an awm lo a; enkawl mek mi 158 (0.07%) chiah awmin, a tlem tial tial.

September 25-a Covid-19 positive hmuh thar mi pakuate chu mipa pali leh hmeichhia panga niin, rapid antigen test hmanga hmuh chhuah vek an ni. Aizawl, Lunglei leh Saitual district-ah mi pathum ṭheuh hmuh chhuah a ni a, swab sample 78 endik aṭanga positive zat chu 11.54% a ni.

Kumin September thla bikah hripui vei ni khata hmuh chhuah zat 10 aia a tlem ṭum ni thum a awm tawh a, ni 18-ah mi pariat leh ni 11 leh ni 25-ah mi pakua ve ve hmuh a ni. September 25 hi August 28, 2022 hnua sample endik a tlem ber ṭum a ni bawk.

IDSP record angin, Mizoramah Covid-19 vei 2,38,304 hmuh chhuah a ni tawh a, mipa 1,11,005 leh hmeichhia 1,27,299 an ni a, mipa aiin hmeichhia 16,294-in an tam zawk. Nimin tlai dar 5 thleng khan mi 2,37,423 (99.63%) chhuahtir an ni tawh a, mi 723 (0.30%) thi tawhin, enkawl mek mi 158 (0.07%) an awm.

Siaha district-ah Covid-19 vei enkawl lai an awm tawh lo a, district dang pangaah pawh 10 aia tlem vek an awm tawh. Active case 10 aia tam awmna district panga a awm a, a tamna ber Aizawl district-ah mi 60 an awm a ni.

Kum 2011 chhiarpui angin, Covid-19 vei hmuh tawh 2,38,304 chu state mipui zat aṭangin 21.72% a tling a, India rama state zingah a sang ber a ni.