MNF-in Martarte Ni an hmang

MNF party chuan ni­min khan Mizoram hmun hrang hrangah Martarte Ni an hmang a, MNF general headquarters-a hruaitute'n an hmanpui.

Martarte Ni hmannaah hian Aizawla Martar Thlan­mualah MNF hruai­tu­te leh martar chhung­kuate'n pangpar an dah al; Lungleiah pawh veng hrang hrang thlanmuala martarte thlànah pangpar an dah bawk.

Martarte Ni hi Aizawlah chuan Luangmuala Martar Thlanmualah MNF senior vice president Tawnluia hoin hman a ni a; Tawnluia chuan, Martar Ni chu kum 1980-ah hman ṭan a nih thu sawiin, Martar Thlanmualah hian mi 1,702 dah an nih tawh thu a sawi.

Tawnluia chuan, March 1, 1966-ah Laldenga hoin Mizoram inde­pendence puan a nih tih sawiin, "Tharum tel loa tih ni rawh se, tih a nih laiin India sorkarin Mizote nuai chimih tuma a beih tak avangin Mizo ṭhalai rualte ram leh hnam chhana an rammut a lo ngai ta a ni. Intiamna thu an lo chham ang ngeiin, Mizo mipuite leh lo la kal zel turte tan an nunna an hlan a, a ropui a, sawi dal chi leh sawi nêp chi a ni lo. A takin ram leh hnam tan an nunna an hlan a ni," a ti.

Lungleiah chuan Mizo Hnam Runah hman a ni a, MNF president Zoramthanga'n a hmanpui. Zoramthanga chuan, Mizoram tana martarte zahna leh chawimawina chibai a bûk tih sawiin, "Martarte'n a man an pek hlut zawng hi chhût chhuah theih loh khawpa hlu a ni a, thisena a man an pek sa hi Zofate hian a man kan pek ve a ngai a ni," a ti a; martarte hniakhnung zuia inhlan thar turin a sáwm.

Zoramthanga chuan, Congress sorkar chu ram leh hnam leh Pathian pawi an sawi avangin kum 2018 Assembly inthlanah an tla dawn nia sawiin, "Kan hun lai aiin a let rukin sum an ngah zawk chungin Congress sorkarah hian hmasawnna hmuh tur a awm lo a, mahni mimal inhaivûr chiah an ngaihtuah a ni," a ti.

MNF vice president R Tlang­hmingthanga'n Sialsukah a hmanpui a, thu sawiin, "MNF-in hnam martarte a theihnghilh ngai lo. Hnam martarte duhthusam lo angin Zoram a awm mek a, Zoram mipuite duh dan ang loa roreltu, mikhual rilru pua min hruaitute hi kan reltir reng dawn em ni?," a ti a; hnam damna duhtu tan MNF sorkartir a ngai niin a sawi.

MNF vice president dang Dr R Lalthangliana chuan Hnahthialah a hmanpui a; thu sawiin, "MNF hi Mizo hnam hma hruaitu a ni a, MNF-in independence kan sual hi inchi khat pawhin kan la tawlh lo a, kan hun tiam ni lo, Pathian hun tiam kan la thleng lo ang tih a sawi theih loh," a ti. Dr R Lalthangliana hian zing karah Capt. Lalhleia thlânah pangpar a dah a ni.

Kânghmun khuaa Martarte Ni hmanna chu MNF treasurer Vanlalzawma'n a hmanpui. Vanlal­zawma chuan, ram leh hnam martarte chu an theihnghilh dawn lo a, an hlutna an la hre chiang telh telh dawn tih sawiin, "Ṭhangtharte'n an martarna hlutzia hi an ngaisang tulh tulh ang. Independent an sual lo, titute kha an inchhir hun a la thleng ngei dawn a ni," a ti.