Zirna ṭha atan ṭanrual a ngai - Education Minister

Bilkhawthlir MZP chuan BNRGSK building-ah an khuaa master degree leh bachelor degree nei tharte chawimawina hun an buatsaih a; khuallian, School Education minister H Rohluna chuan, zirna ṭha a awm theihna atan sor­kar, khawtlang hruaitute leh nu leh pa an ṭanrual a ngaih thu a sawi.

School Education Minister chuan, zirna tel loin hmasawnna tluantling a awm thei lo tih sawiin, "Zirna ṭha a awm theih nan Education department hmalakna a tawk mai lo a, khawtlang hruaitute leh nu leh pa te kan ṭanrual a ngai. Zirna ṭha a awm theih nan sorkarin theihtawp a chhuah zel a, hemi atan hian national level-a zir ang zirlaibu siam a nih bakah, internal evaluation system-te siam a ni," a ti.

Minister H Rohluna sawi dan­in, zirtirtu indaih lohna sutkian nan zirtirtu primary section-ah 100 leh middle section-ah 60 lak tura peih a ni tawh a, science leh mathematics zirtirtu 100 chuang lak turin exam kalpui thuai a ni dawn.

Zirlaite chu note book leh guide book-te by-heart mai lo a, zirlaite hrethiam tur leh thiamna tak tak nei thei tura taima tura fuihin H Rohluna chuan, "Hemi kawngah hian zirtirtute pawhin zirlaiah thiamna tak tak tuh thei tura ṭan lak a pawimawh," a ti.

Bilkhawthlira zirlai chawi­mawina hlante hi master degree nei thar pathum leh bachelor degree nei thar pakua an ni.