Cancer enkawlna din dan tur sawiho

Rajya Sabha MP Ronald Sapa Tlau leh Health minister Lal Thanzara hoin September 19, Thawhlehni tlai khan CMO conference hall-ah Japan International Coperation Agency (JICA) ṭanpuina hmanga cancer enkawlna hmunpui, Mizorama din dan tur sawiho a ni.

Ronald Sapa Tlau chuan, Mizorama cancer enkawlna hmunpui din tura JICA a sawipui dan sawiin, "Cancer inenkawlna hmunpui beisei mek hi Mizoram mai ni loin, hmarchhak state dangte leh ram ṭhenawmte'n an chhawr thei dawn a ni. JICA lam pawh he project atana fund pe chhuak turin an phûr viau," a ti.

Lal Thanzara chuan, cancer enkawlna atan sorkar, state economy leh mimal ang pawha sum hmante a san hle thu a sawi a; project atana ngaituahna sêng a, JICA-te a tìr aṭanga lo dawrtu Rajya Sabha MP chu lawmthu a hrilh.

Meeting-ah hian, Health department hotute bakah, Public Health Foundation of India (PHFI) mithiamte an tel a; PFHI mithiamte chuan project an mitthla dante an sawi.

Meeting-ah hian project thar ruahman tur hi amah in a hranga din nge ṭha ang tih te, Mizoram State Cancer Institute nena kal kawptir thei dan kawng awm leh awm loh te, JICA lamin ṭha an tih dan turte sawiho a ni.