KHAWTHLIR
CYMA leh MHIP lawm
Central YMA leh MHIP chuan thuchhuah siamin, Mizoram sorkarin YMA Day, holiday atana a puang leh ta chu lawmawm an tih thu an tarlang. CYMA chuan, YMA Day chu Mizoram sorkarin holiday-a a puan ang ngeiin, YMA member tinin ṭanpui ngaite ṭanpuina ni-ah hmang ṭheuh se an duh thu an sawi a, "Kohhran leh pawl dangte pawhin he ni pawimawh tak hi programme dang siam lo a, mite tana inpekna nía hmang ṭheuh turin Mizo mipui kan sáwm a ni," an ti.
Thisen pe
Lawngtlai College NSS chuan nimin khan an college-ah blood donation camp an huaihawt a; 3rd. semester leh 5th. semester zirlai mipa 15 leh hmeichhia pahnihte'n Lawngtlai District Hospital tan thisen unit 17 an pe.
BLO training
Serchhip district chhunga booth level officer (BLO)-te tan nimin khan DC conference hall-ah Special Summary Revision of Electoral Roll, 2018 atan training buatsaih a ni a, DC Sangchhin Chinzah-in a hmanpui. Kolasib DC chuan, kum 18 tling zawng zawngte electoral roll-a an chuan vek theih nana an hriat tur leh an tih turte chiang hle turin BLO-te a chah.
Science Congress
Science Teachers’ Association Mizoram (STAM) leh Lawngtlai District RMSA ṭangkawp chuan nimin khan Don Bosco School Hall, Lawngtlaiah District Level Children Science Congress 2017 an buatsaih a, Lawngtlaia high school panga aṭangin zirlai 30 an tel. District level-a ti ṭhate chu state level inelnaah an tel dawn a ni.
Signboard vai liam
Swachh Bharat Mission (Gramin) hmalaknain Kolasib district-a khaw chhung leh khaw karkawnga tàr tur signboard-te chu nimin khan Kolasib DC R Zarzosanga'n DC pisa kawt aṭangin a vai liam. Kolasib DC chuan, "Faini hi khaw chhung leh mahni in leh velah bul ṭan ila, kan awm dan tur reng a ngaih hun a la thleng thuai ang," a ti.