Lirthei intlan chhâwk dan tur sawifiah
Traffic SP C Lalthanmawia chuan, October 2017 chhung Aizawla lirthei intlân chhâwk enchhin tur a sawifiah. Lirtheite chu an registration number tawp ber digit anga intlan chhâwk tur a ni.
Lirthei intlân chhâwk hi Aizawl khawpui tâwt lutuk tihziaawmna a nih beiseia kalpui tur a ni a; hemi tur hian Mizoram sorkar chuan August 22, 2017-ah notification a tichhuak. Coordination Committee on Traffic Management hotute September 5, 2017-a ṭhukhawm chuan a enchhin nan October 2017 chhung intlan chhawk phawt an rel a ni.
Traffic SP chuan, thupek zâwm lo mante chu MV Act Section 179 hmanga hrem an nih tur thu tarlangin, "Intlan chhâwk enchhinna hi a ṭhat dan azirin chhunzawm zel emaw, tihdanglam emaw a ni ang," a ti a; a ṭhat zawk dan tur rawtna nei chuan October 25, 2017 hmain Traffic SP hnenah thehluh theih a nih thu a tarlang bawk.
Traffic SP thuchhuah
1. Intlân chhâwk hian mimal lirthei leh sorkar lirthei, two wheeler-te pawh tiamin (exempted bik tiam loin) a huam.
2. Lirthei registration number-a digit tawp ber ang zel ní-ah lirthei tlan chhuah khap a ni. Registration number 4-a tawp chu ni 4, 14, 24-ah a tlan chhuak thei lo ang; 2-a tawp chu ni 2, 12, 22-ah a tlan chhuak thei lo ang. Hetiang a nih dawn avangin, mimal leh sorkar motor hi thla khatah vawi 3/4 vel an tlan chhuak thei dawn lo a ni.
3. Tlan chhuah phal loh hun hi zing dar 8:30 aṭanga tlai dar 6 inkar a ni ang.
4. Mizoram district dang leh state páwna register, private motor Aizawl khawpuia awm leh tlan lut tur reng rengte pawh intlan chhâwk hian a huam ang.
5. Tlan chhuah phal loh ni hian Pathianni chauh a huam lo ang.
A huam loh turte
1. Governor, Chief Minister leh Speaker-te (an carcade tiamin) a huam lo ang.
2. Public service vehicle (passenger phur chi lirthei) - city bus/bazar bus, maxicab (state dang registered huamin), auto-rickshaw, institution bus, department bus, two wheeler taxi-te a huam lo.
3. Taxi-te hi tuna an intlân chhâwk dan pangngai ang hian an tlan chhunzawm zel ang.
4. Police department motor duty, Fire (FES) motor, Excise & Narcotics motor duty, damdawi-in duty leh ambulance/morgue van, executive magistrate law and order duty leh emergency duty, media mite (MJA sticker tárte chauh), PHE emrgency duty leh PHE tui sem, Power & Electricity emergency duty, bawnghnute sem, chanchinbu sem, AMC hnuaia bawlhhlawh paih motor duty, sipai leh para-military force, government department/office despatch rider-te a huam lo.
5. Lirthei 407 truck leh a chung lamte National Highway-54 Bawngkawn leh Zemabawk inkara tlan dan tur Traffic Police-in an lo ruahman tawh sa anga tlan tlang turte a huam lo.