World Alzheimers Day 'Memory Walk'

Alzheimer's and Related Disorders Society of India (ARDSI), Mizoram Chapter chuan nimin zing khan Aizawlah World Alzheimers Day pualin kawng an zawh a, Health minister Lal Thanzara'n a hmanpui.

World Alzheimers Day puala buatsaih 'Me­mory Walk' hi Chan­mari kawn aṭanga ṭan a ni a, Millennium Cen­tre tualah tawpin, inkhawm tawi buatsaih a ni. Kawngzawhah hian Alzhei­mer natna tuar tawh chhungte leh zirlaite an tel.

Health Minister chuan, Alzheimer natna chu Mi­zorama la hriat lâr loh tak a ni a, hriat chian loh vanga a natna veitute'n an mamawh ang ngaih­sakna an lo dawn loh phah ṭhin chu tunah chuan mi ṭhahnemgai leh mithiamte zarah hriat lâr ṭan a ni tih a sawi a, "Natna veitute'n ngaihsak leh duat an hlawh phah ngei ka beisei," a ti.

Lal Thanzara chuan, Alzheimer natna chu mahni emaw, chhungte emaw chungah a thleng a nih pawhin vanduai bik inti a, hrehawm ti ngawih ngawih lo a, mi dang an awm ve tih hre renga inhnem a pawimawh tih a sawi a; Alzheimer natna chu upa lama thleng tam ber a nih avangin, a veite tan hmangaihna lan chhuahtirna hun remchangah hmanga ngaihsakna lantir turin mipui a chah.

ARDSI, Mizoram Chap­ter chuan Alzheimer natna chu 'thluak sáwng natna' tih a nih thu sawi­in, Mizoramah pawh natna hriat hlawh tak a nih tawh thu an tarlang a, "A tihdamna a awm lo, tih ni mah se, a veite enkawl danah chhungkua, ṭhenawm khawvengte leh khawtlang hriatthiamna, enkawl thiamna leh inṭawiawmna hi thil ṭul tak a nih avangin a ngaihventu pawl din a ni," an ti.

Alzheimer leh a anpui natna dangte ngaihventu pawl ARDSI hi Mizoramah chuan September 21, 2015-ah din a ni a, an din ni hi World Alzheimer's Day a ni.