Mizoram sorkar leh HPC-D inbia

Mizoram sokar aiawhte leh Hmar People's Con­vention - Demo­crats (HPC-D) hruaitute chu nimin khan remna zawngin State Guest House, Aizawl­ah an inbe leh a, vawi­in­ah chhunzawm leh a ni dawn.

Mizoram sorkar aiawhte hi Home additional secretary Lalbiakzama'n a ho a; mi dangte chu CID(SB) SP Rodingliana Chawngthu, RD director Lalhriatpuia, Home deputy secretary leh OSD David H Lalthangliana te an ni. HPC-D lam chu working chairman Lalthang­liana Hmar-in a ho a; member dangte chu - Lalṭhalien, Lalthlamuana, Dr John Pulamte, David Buhril leh Lalmuanpuia te an ni.

Vanglaini zawhna chhangin Lalbiakzama chuan, inbiakna tluang taka kalpui a nih thu a sawi a, "Thil chipchiar zawkin kan sawiho a, naktuka inbiak leh hunah chuan thu chiang zawk a awm theih tawh beisei a ni," a ti.

Lalṭhalien pawhin inbiakna chu tluang taka kalpui a nih thu Vanglaini palai zawhna chhangin a sawi a, "Engmah harsatna a awm lo a, thu inhmuh lohna em em pawh kan nei lo," a ti a, vawiina inbiak zawhah chuan remna kawng an zawh theih a beisei thu a sawi.