Rider hlawhtlingte lawmpui

Kumin September thla tîra neih, 20th. JK Tyre FMSCI National Racing Championship-a Mizo rider che ṭhate lawmpuina hun nimin khan Mizoram State Sports Council (MSSC) pisaah buatsaih a ni a, Chalrosanga Ralte, MLA-in a hmanpui.

Chalrosanga Ralte chuan, racing chu inelna hautak leh sum hrâwm na tak a nih avangin Mizo ṭhalaite tan harsatna tam tak sut tlang a ngai dawn tih a sawi rualin, eizawnna tling khawpa an hlawhtlinpui a duhsak thu a sawi a, "Sum leh pai an sêng nasa a, a enkawltu Mizoram Motor Sports Association (MIMSA) tan pawh luhaina tham tling khawp a ni. Chuvangin, inelnaa tel phate chuan tih tak zetna leh tumruhna nen, hlawhtling ngei an tum tur a ni," a ti.

Katari Speedway, Coimbatore-a neih inelnaah hian Redbull Road-to-Rookie Cup-ah Lal­hruaizela, Bawngkawn chu pakhatna niin, K Lal­nunsanga, Electric Veng, Aizawl chu pahnihna a ni. Suzuki Gixxer Cup round hnihna bikah Malsawmdawngliana, Kanan Veng chu pakhatna a ni bawk. Gixxer Cup bik hi chu Buddh International Circuit, Greater Noida-ah final round tlan leh tur a la ni.