Tlang ram hmasawnna ngêlnghet zirho

Tlang rama hmasawnna ngêlnghet atana tih tur leh hmalakna kalpui dan tur chungchanga inràwnkhawmna, Sustainable Mountain Development Summit VI (SMDS VI) chu September 20, Nilaini tlai khan Mizoram University-ah chief minister Lal Thanhawla'n a hawng.

Chief Minister chuan, hmasawn mek leh ṭhang lai, tlang ram state-te tana pawimawh, zirchianna leh sawihona hun Mizorama nghah a ni chu lawmawm a tih thu a sawi a, "Thiamna, inthlun zawmna leh intlawhpawh tawnna kawng hrang hrangah khawvel a ṭhan chak viau laiin, mi zawng zawngin pawimawh kan tih tlan vek pakhat a awm a, chu chu hmasawna ngêlnghet, hma lam hun a tana him si a ni," a ti.

CM Hawla chuan, hmar­chhak bial, fûra ruahtui tam, ṭhála tui vàn em emna chu mipui hlâwkna tura siam dan ngaihtuah a pawimawh thu sawiin, "Kan in bakah, kan huan­ahte senso tlem zawkin engtin nge ruahtui kan khawl ang tih mithiamte'n chhanna hmu se ka duh," a ti a; tlang rama khawpui ṭhang mekte'n khuarel chhiatna an tawh ṭhin ven dan kawng zawn a ṭul thu a sawi.

Hmasawn an duh a, hmasawn turin ṭan an la vek tih sawiin Lal Thanhawla chuan, "Hmasawn kan duh luata ṭhang leh thar hman tur awm lêk loa kan leilung hauhsakna kan tihchereu si chuan thil pawi lian tak kan khawih tihna a ni ang", a ti.

SMDS-VI hawnna inkhawm­ah hian a thlengtu, Mizoram Sustainable Development Foundation (MSDF) aiawhin president Dr Lalbiakmawia Ngente-in palaite lawmna thu a sawi.

SMDS-VI hian ni thum chhung a awh dawn a; India ram hmun hrang hrang leh ram páwn lam palai 300 rual velin tlang rama hmasawnna ngêl­nghet neih theih dan an zirho dawn bakah, an thil zir leh tawnhriatte inkawhhmuh tawnna hun ang hmang dawn a ni.