Umang Festival khâr a ni

North East Zone Cultural Centre (NEZCC), sorkar laipuia Ministry of Culture leh Art & Culture department bultumin nimin khan Pi Zaii Hall, Synod Conference Centre-ah vohbik naupangte puala intihhlimna, Umang Festival vawi 8-na khârna hun buatsaih a ni a; Art & Culture minister R Romawia'n a hmanpui.

R Romawia chuan, nu leh pa ṭhen­khat, mahni fate ngei enkawl ṭha peih lo leh hlamchhiah an awm laia naupang enkawl ngai bikte enkawltu pawl leh mithiam tak tak enkawltu leh zirtirtu an awm chu vanneihthlak a tih thu a sawi a, "Tun hma chuan rualbanlote hi nuihzat leh biak nawmnah an hlawh a, tunah erawh chuan duat leh uluk taka enkawl leh zirtir an ni tawh a, mi thiam tak takten an kaihruai tawh a ni," a ti.

Art & Culture Minister chuan, mihringte chu rilru leh taksa, pian hmangte inang vek lo mah se, Pathianin a duh taka a siamte zinga mi an ni vek tih sawiin, "Pianphunga rualbanlote aiin rilru lama rualbanlo kan pung chho ta tlat mai hi a pawi a, inven a pawimawh," a ti a; pumrua pangai tak si, hna thawh tum tlat lo, kutdawh rilru put tlatte a hrisel loh thu a sawi.

Umang Festival hi Mizoramah chuan kum 2009-ah hman ṭan a ni a, kumin hian September 19 aṭangin hman ṭan niin, Aizawl khawpuia sikul paruk an tel a ni.