Chhiatna a thlena mipuite Ṭanpui theih dan tur sawiho

State Steering Committee for National Emergency Response System chu nimin khan DGP Thianghlima Pachuau hoin an ṭhu-khawm a, chhiatrupna a thlena mipuite'n ṭanpui-na an dawn theih dan tur an sawiho.

Thianghlima Pachuau chuan, sorkar laipuiin mipuite'n harsatna hrang hrang an tawha awlsam taka ṭanpuina an dawn theihna turin state tinah National Emergency Response System din vek tura a tih chu Mizoramah pawh bawhzui mek a nih thu a sawi a, "Centre for Development of Advanced Computing (CDAC) nen thawk hoin National Emergency Response System hi technology changtlung tak hmangin Mizorama kalpui tura hmalak mek a ni," a ti.

Meeting chuan, chhiatrupna a thlena mipuite phone call chhángtu turte awmna hmun, Public Safety Answering Point (PSAP) chu Aizawl SP Office chung zawlah sak turin a rel a; National Emergency Response System kalpui hmasakna tura thlan - Aizawl, Lunglei, Kolasib leh Champhai district-ahte emergency response-a hman turin lirthei Sumo panga leh two wheeler pariat lei an rel bawk.

National Emergency Response System hnuaiah hian emergency number 112-ah tu pawhin harsatna eng pawh - kângmei, pawi khawihna (crime), chetsualna (accident), chhiatrupna, natna leh rîkrum thil (emergency) dangte hriattir vek theih tura ruahman a ni a; NERS aṭang hian ṭanpuina ṭul ang angte a rang thei ang bera ngaihtuah a ni ang.