MLA fund-a hna pek dan rual loah an ngai

PRISM chuan, Aizawl North-III bialtu MLA-in a bial chhunga MLA Fund a hman dan chu a rual lo hle niin an tarlang a, "Chanmari West Local Council-in hna pakhat mah an chan loh laiin, Electric Vengah hna 18 zinga 11 (61.11%) an chang," an ti a; bialtu MLA Lal Thanzara, minister chu hleih neih taka thil tiah an puh.

Nimina PRISM thuchhuah chuan, Electric Venga Aizawl North-III MLA Fund hmanga hna thawh 18 chu hmuh tur a awm vek tih sawiin, "Heng zinga hna thawh pakua (50%) hi ṭha hleah kan ngai a, a dang pakua (50%) chu an sum sen enin, a aia ṭhaa thawh theihah kan ngai," an ti a; hna thawh 18 zinga pali-ah chiah signboard târ a nih thu an sawi.

Electric Venga MLA fund hmanga hna thawh zinga MUP thawh pathum chu an thawk ṭha viaua a lan laiin, inkaihhruaina kalh vek niin PRISM chuan an sawi a, "LC-in hna an thawh nia document-a lang 11 zinga an thawh tak tak chu pahnih chauh a ni a, Congress unit-in pariat leh welfare-in pakhat an thawk. LC thawh hi a ṭha hle a, Congress unit thawh panga leh welfare-in an thawhte chu duhthu an sam lo hle," an ti.

PRISM chuan, "Guidelines kalha hna inpek a nasa em em hi a ṭha kan ti lo a, MLA-te'n ngaihtuahna thar sêng se, guidelines hi siamṭhat law law ni se ṭha kan ti," an ti a; MLALAD Fund kalpui dan chu ennawn ṭul an tih thu an sawi bawk.