Ruihhlo ngai 1,000 len theihna turah Kuminah mi dah luh hman beisei a ni

Vanglaini palai zawhna chhangin SWD Minister chuan, Jordan Centre buatsaih hna chu Covid-19 vangin duh angin a chak thei lo tih a sawi a, "A hmunhma buatsaihna atan SEDP hnuaiah cheng vbc. 10 ruahman a ni. Covid-19 vangin a chak tur angin a chak lo. Theihtawp kan chhuah a, hripui léng karah chuan thawk chak kan inti ve khawp mai," a ti.

Dr K Beichhua chuan, in awm sate siamṭhat vek a nih thu sawiin, "Building-te a rei tawh avangin thawm ṭhat an ngai hle a, thawm ṭhat hna hi 90% vel chu kan zo tawh. A hungna chei ṭhat hna kan zo thawkhat tawh a, biak-in pahnih a awm a, kan zauh ve ve. Damdawi-in khum 10 awmna tur sak mek a ni," a ti a; Covid-19 vangin April 2020-ah hna an thawh ṭan theih chauh thu a sawi.

SWD Minister chuan, tuna hmunhma an buatsaih mekah mi 300-400 an len theih an beisei thu sawiin, "Tuna hmun kan neih sa bula Agriculture department-in ram min pek chu a laih zàwl hna thawh mek a ni a, kan zo ṭêp. He lai hmun hi peih a nih hunah chuan Jordan Centre-ah hian mi 1,000 an len theih kan beisei a, chumi tur chuan hma pawh kan la a ni," a ti.

Dr K Beichhua sawi danin, Jordan Centre-a awm turte chu an luh dawnah centre-a damdawi-inah an hriselna dinhmun endik a ni dawn a, chumi hnuah ruihhlo an châk vanga harsatna an neih lohna turin enkawl a ni ang. Ruihhlo an châknate a reh hunah ruihhlo an nghei hlen theih nan enkawl a ni ang a, chumi hnuah thiamthil chi hrang hrang zirtir a ni ang.

Ministry of Social Justice and Empowerment chuan Jordan Centre-a thawktu turte lakna atan SWD hnenah cheng nuai 750 a pe tawh a; Centre peih a nih veleh thawktu tur lâk a ni ang.