Aizawl khawpuiah a vawikhatna atan Littering fine a awm tawh dawn - Zodintluanga
UD&PA, Sports etc Minister Pu Zodintluanga chuan India rama a vawikhatna atan Aizawl khawpui hmun hrang hrangah khawlaia bawlhhlawh paihten pawisa chawi zel tawh tura ruahmanna siam a nih thu a sawi. He thu hi National Service Scheme (NSS) Foundation Day vawi 49 lawmna nimina AR Ground-a neihah a sawi.
Khuallian Pu Zodintluanga chuan NSS hnuaia zirlaite hnathawh chu chhuanawm a tih thu a sawi a. Mizoram hi state fai ber ni turin hmalak mek a ni tih sawiin hemi kawngah hian NSS-te an pawimawh hle a ni, a ti. Mi harsa leh damloten an hman ṭangkai theih nan NSS-in thisen an pe ṭhin chu lawmawm a tih thu a sawi a, littering fine kalpuina turah pawh hian NSS-in an thawh hlawk hle dawn a ni, a ti.
NSS Foundation Day pual hian Aizawl khawpui-a kawngpui pawimawh hmun nga NSS volunteer-te hian an tihfai hnuin AR Ground leh a chhehvel an tifai nghal bawk a ni. India ram pumah NSS Volunteer nuai 40 vel an awm mek a, tun dinhmunah hian Mizoram pumah College 26 leh Higher Secondary School 54-ah NSS hi an awm mek bawk a ni.
NSS hmalakna hrang hrang zingah faina chungchang inzirtirna leh public hmun thenfai hi an ngai pawimawh hle. Nikum khan Cleanliness Drive vawi 190 vel neih niin kumin hian vawi 100 vel Cleanliness Drive hi an kalpui tawh bawk a ni. Sports & Youth Services Secretary Pu H.L Rochungnunga chuan programme hi a kaihruai a. State NSS Officer leh Deputy Secretary NSS cell ni bawk Dr. Zirlianngura chuan NSS hnathawhna leh hmalakna report a pe.