MPF-in inthlan hmachhawn dan tur an zir

Mizoram People Forum (MPF) chuan nimin khan Synod Conference Centre-ah annual general meeting an nei a, '2018 General Election hmachhawn dan tur' tih an zirho nghal.

Inkhawm kaihruaitu MPF president Rev. Lalzuithanga chuan, "Chanthin Ṭha kalsanin Zoram chu materialism-ah kan tlut lut a, chu chuan corruption leh thil sual dang tam tak a pian tir a, MLA inthlan lo awm turah pawh political party-te'n min bum tumin nasa takin ṭan an la leh dawn. Nuai 2/3 hi a hlu teh meuh mai a, mah se kan tu leh fate chenna tlaka kan ram kan siam a pawimawh zawk a ni," a ti.

Zu leh drug hluarin nghawng a neih thu sawiin Rev. Lal­zuithanga chuan, "India rama mi cheng ratio lakin hmeithai tamna ber ram kan ni te hi a ngaimawh awm hle a, kan Kristiana a langsara kan nun erawh a mualpho thung. Therhlo leh sum awlsamah kan buai nasa lutuk tawh a, hetianga kan kal zel chuan kan tu leh fate an din chhuah a rinawm lo a ni,” a ti.

Chawhnu lamah MPF vice president Upa Lalbiakzuala kaihhruaiin Rev. Dr. R Lal­biakmawia thuziah 'Kum 2018 General Election hmachhawn dan tur' tih chu zirho a ni.

Political education cam­paign neih dan tur sawiho nghal a ni a, campaign thupui atan 'Ram chu Lalpa ta a ni (Sam 22:28: “24:1)' tih thlan a ni a, thupui sawi tur hian Pastor, Kohhran Upa leh MPF hruaitute hman ṭhin nise tih a ni.