Pathian nung chiah ka ráwn - Hawla

Chief Minister Pu Lal Thanhawla chuan nimina Congress Bhavan-a an party political session-ah Minister thar a ruat chung­changah Pathian nung tih loh chu tumah a rawn loh thu a sawi. MNF sorkar khan miretheite chan ai an ei nasa a, an thisen zawmpui leh chhungkhat laina te an vulh nasa lutuk a, an PHE Minister fapa khan tui metre zawng zawng a supply vek hial a ni awm a. An CM nau-in Tuirial HEP compensation a la ṭeuh bawk a ni, a ti. MNF sorkar khan Aizawl Water Supply Scheme phase II kha hmantlak mang lohvin an chhuah a, Congress sorkar hnu-ah PHE Minister ṭanlakna-in sum tam tak sengin kan chei ṭha leh thei chauh a ni, a ti bawk.

CM Political Adviser thar, Pu Lalrinmawia Ralte chuan a hna a la zawm loh thu leh, he nihna atang hian hlawh leh hamṭhatna, petrol far khat takngial pawh a la dawn lo niin a sawi a, BJP Mizoram Pradesh-in MLA atanga bang tura an tih chungchang chu dan lam thiamten an la rawn sawifiah dawn niin a sawi.