Rethei umbona tur Scheme sawifiah
Rural Development (RD) minister R Lalzirliana chuan nimin khan CS conference hall-ah thuthar thehdarhtute kawmin, retheihna umbona tura ruahmanna a siam Mission Antyodaya kalpui a nih dan tur a sawifiah.
R Lalzirliana chuan sorkar laipuiin mipuite chawi kan a tum tih sawiin, "Industry lam ringawt ni loin, retheihna lak ata in chhan chhuah a nih loh chuan India a nuam dawn lo tih a hria a ni. Retheite chhan chhuak tur hian sorkar laipui chuan hma a la a, chumi atan chuan state-te tih tur a tuk a ni," a ti.
RD Minister sawi danin, sorkar laipui ruahman dan ang chuan kum 2020 hian khaw thlan chhuah 50,000 chu rethei awm tawh lohnaa puang turin hma lak mek a ni a. Mizoram bikah chuan khaw 183 thlan chhuah a ni a, a bak zawng khua chu kum 2002 ah rethei awm lohnaa puan tura hmalak a ni ang.
October 1-15 chhung hian department hrang hrangte chuan an department hmalakna leh scheme kalphungte mipui an hrilh ang. October 1-15 chhung vek hian khaw thlan bik 183 ah baseline survey neih a ni dawn a, khaw tinah SRLM aiawh pakhat leh zirlai pakhat zelin survey hi an buaipui dawn a ni. Heng khaw thlan bika BPL chhungkaw zatte chu chhinchhiah an ni ang a, kum 2020 ah chuan BPL awm tawh lohna khuaah siam tum an ni.