Infiamna hmun tihchangtlunna tur Nuai 23,000 hmuh a ni tawh - SYS Minister

Mizoram Football Association (MFA) chuan nimin khan Aijal Club-ah Special General Body Meeting an nei a; khuallian Robert Romawia Royte, Sports & Youth Services (SYS) minister chuan, Mizoramin infiamna hmunhma tihchangtlunna atan cheng nuai 23,000 hmuh a nih tawh thu a sawi.

SYS Minister chuan, Mizo­ramah infiamna hmunhma nasa taka siam belh leh chei ṭhat a nih dawn thu sawiin, "Mizo­­rama infiamna hmunhma tih­­changtlunna tur cheng nuai 23,000 hmuh a ni tawh a, heta ṭang hian a chanve chu sorkarin a dawng tawh," a ti a; district football association hruaitute chu khelmual siamtu contractor-te lo enpui a, an zawh hmain sawisel ngaite sawisel turin a chah. 

Robert Romawia chuan, All India Football Federation (AIFF) pawmpuinain India hmarchhak huap football inelna lian tak kum tina neih tur buatsaih tuma hmalak a nih thu sawiin, "MFA leh district FA-te hi mawhphurhna la a, a buai ber ber tur in ni dawn," a ti. MFA meeting-ah hian MFA president Lal Thanzara kaih­hruaiin rorel a ni a, agenda pakua ngaihtuah a ni. Covid-19 vanga football inelna chawlhsan lailâwk chu sorkar thuchhuak leh Mizoram dinhmun thlir chunga la chawlh chhunzawm rih turin an rêl.