Petrol ṭha lo leh gas man

Legal Metrology enforcement staff-te chuan July 23, Ningani khan Aizawla MIZOFED Petrol Pump-a dah tur petrol ṭha lo litre 12,000 an man. Nimin khan V Neihkunga Gas Agency-a dah tur truck AS-11 AC-0115-in gas a phurhte zinga búr 79 chu a nih tur aiin a zàn avangin an man bawk a; truck khalhtu Babul Hussein Laskar s/o Jabed Ali Laskar a ni.

Legal Metrology enforce­ment hian MIZOFED pump-a dah tur tanker MZ-05 3804-in petrol a phurh chu an enfiah a, density quality test-ah thil dang (khawnvartui) pawlh a ni ngeia a lan avangin an man a ni. Tanker khalhtu chu I Laskar s/o HU Uddin, Dhonin Hari, Cachar, Assam a ni a; Motor Spirit & HSD (Regulation of Supply & Distribution and Prevention of Malpractices) Order, 2005 angin an man a, dan anga bawhzui turin Aizawl DC-ah an thlen a ni. 

Legal Metrology chuan, petrol leh diesel a thlen apiangin endik turin anmahni hrilh zel turin petrol pump manager-te an hriattir a ni.