Covid-19 vei 6 hmuh belh Mizorama kai tawh zat 332

July 23, Ningani khan Lunglei Civil Hospital (LCH) laboratory-ah TrueNAT hmangin Covid-19 hripui vei mi paruk hmuh chhuah a ni a, Zoram Medical College-ah erawh chuan endik mi 197-te an fihlîm vek thung. Mizorama hripui kai tawh zawng zawng chu mi 332 an ni.

LCH laboratory-ah hian Ningani khan mi 27-te swab sample endik a ni a, mi 21-in hripui an vei loh laiin, mipa parukin an vei a ni. Covid-19 vei hmuh thar parukte hi BSF sipai vek niin, kum 27-51 inkar mi an ni a, West Bengal aṭanga June 25, 2020-a Mizoram rawn thleng, Lunglei bul Vanhnè-a quarantine facility-a khung hrante an nih thu sorkar thuchhuahin a tarlang. 

Sorkar thuchhuah tawhte aṭanga a lan danin, Mizoramah Covid-19 vei mi 332 hmuh chhuah a ni tawh a, chu'ng zinga mi 141 (42.47%) chuan la vei mekin, mi 191 (57.53%)-in an vei tawh lo (negative leh tawh). Vei tawh lo zinga mi 183 chu chhuahtir an ni tawh.

Covid-19 vei hmuh chhuah tawh 332 zinga 205 chu civil mi an ni a, mi 127 chu sipai mi leh sa an ni thung. A vei mek, la negative lo mi 141 zinga mi 37 chu civil mi an ni a, 104 chu sipai an ni. Sipai zinga Covid-19 vei hmuh chhuah tawh dan chu - Aizawl district-ah 100 (NDRF - 32, AR - 50, BSF - 16, Assam Regiment (Mizo) - 2); Lunglei district-ah BSF mi 24, Serchhip district-ah BSF mi pahnih leh Champhai district-ah Assam Regiment (Mizo) pakhat a ni.