SMATEE 2020 exam tum an tam

Mizoram sorkar quota-a medical leh technical course zir tur thlanna tur, State Medical and Technical Entrance Examination (SMATEE), 2020 exam tum an tam a, Covid-19 lêng vang a nia hriat a ni. Hetih lai hian, hmarchhak state páwn lamah Mizoramin MBBS seat a nei tawh lo.

Vanglaini palai zawhna chhangin Higher & Technical Education (Technical Wing) hotute chuan, SMATEE exam tuma application form thehlut an tam thu an sawi a, "Kum dang aiin form kan hralh ṭha a, thehlut pawh kum dang aiin an tam hle. A chhan chiah kan hre lo a, Mizoramah science zirna a tlem si a, state páwna zir tura chhuak ngam lo an tam bawk si avangin SMATEE exam tum an tam nì-ah kan ngai," an ti.

HTE (Technical Wing) hotute chuan, SMATEE exam hun hriat theih a la ni lo tih sawiin, "Sorkar laipui lam aṭangin thu dawn kan la nei lo," an ti a; thu dawn an neih veleh exam buatsaih tura an inpeih thu an sawi. HTE chuan, SMATEE exam tumte tan July 15, 2020 aṭang khan exam form lei leh thehluh hun an hawng a, hun an hawn aṭangin mi eng emaw zatin form leiin an thehlut reng a ni.

Hetih lai hian, Mizoram chuan nikum aṭang khan hmarchhak state páwn lamah MBBS seat a nei tawh lo. Zoram Medical College (ZMC)-ah seat 70 a neih avangin Mizoram hian MBBS seat hi kum dang aiin a ngah thung. Mizoram sorkarin MBBS seat a neih dan chu - ZMC-ah 70, RIMS (Imphal, Manipur)-ah pasarih leh Agartala, Tripura-ah pathum a ni.