Mizoram district pathumah IMI kalpui ṭan a ni dawn

Nausen kum 2 hnuai lam leh nau hringtu nute'n hri danna leh damdawi an lak tur ang an dawn kim vek theihna tura beihpui thlakna, Intensified Mission Indradhanush (IMI) chu October thla aṭangin kalpui a ni dawn. Mizoramah chuan Lawngtlai, Lunglei leh Mamit district-ahte kalpui a ni ang.

IMI chungchangah hian Regional Resource Centre for NE (RRC-NE) leh UNICEF te chyan September 23, Inrinni khan Hotel Shoolin Grand, Guwahati-ah media-te pualin workshop an buatsaih a; Assam tih loh hmarchhak state pasarih aṭangin media mi 60 vel telin, Mizoram aṭangin mi pasarih an tel.

'Media sensitization workshop on IMI for NE states' ah hian RRC-NE director Dr Bamin Tada chuan, hmarchhak state panga - Meghalaya, Tripura, Mizoram, Arunachal leh Nagaland-te chu hri danna pek kawngah national average 62% aia hniam an nih thu a sawi a, "A ṭhat tawk loh chhan ber chu mipuiin an hriat tawk loh vang a ni," a ti a, NE state-a naupangte'n hri danna leh venna hrang hrang tha taka an dawn kim theih nan media-te chu ṭan la turin a chah.

Workshop-a tarlan a nih danin, IMI hma hian Mission Indradhanush (MI) kalpui a lo ni tawh a, December 2014-ah hawn niin, April 2015 aṭanga July 2017 thlenga kalpui tawh chhungin India rama district 528 tuam a ni a, Mizoramah pawh district zawng zawng tuam hman a ni. Naupang nuai 247 chuang leh nu naupai nuai 67 vel hnenah hri danna leh damdawi pek a ni.

MI hmang hian kum 2020-ah nau piang zawng zawng aṭanga 90% tal hri danna an dawn tur ang pek kim tum a ni. Mah se, kalpui tawh dan aṭanga thlirin, target hi thleng zo dawn loa hriat a nih avangin IMI hi duan a ni a, IMI hnuaiah chuan December 2018-ah nau piang zawng zawng aṭanga 90% te hri danna leh venna damdawi an dawn tur ang pek kim tum a ni.

IMI hmang hian naupang/nausen leh an nu te, MI hnuaia hri venna damdawi an dawn tur ang dawn ṭhat loh zualna district tuam tum a ni a; MI aia changtlunga kalpui tum niin, sorkar ministry/department tam zawk inhnamhnawihtir tum a ni dawn.

IMI hi Mizoramah chuan Lawngtlai, Lunglei leh Mamit district-ahte kalpui a ni dawn a, thawh lia neih tur a ni. October 7, 2017-ah round-1 ṭan a ni ang a, November 7-ah round-2, December 7-ah round-3, January 7, 2018-ah round-4 ṭan a ni dawn a; round tin hi ni sarih chhung zel kalpui a ni ang.

Workshop-ah hian Mizoram aṭangin thuthar thehdarhtu panga - Samuel Lal­ruatsanga (Zonet), Lalramdinsanga (Zozam Times), Lalzidinga (AIR), T Siama (DDK) leh K Zothanpara (Vanglaini) te bakah offcial pahnih Emily Lalrinpuii (IPRO) leh K Lawmsanga (Health dept.) te an kal a ni.