Assam-a pseudoephedrine man kaihhnawihah Mizoram mi pathum leh Silchar PLO man an ni
Assam Police-te chuan Inrinni zan dar 7:30 vel khan Dholai Police Station huam chhungah Mizorama hralh tur nia hriat pseudoephedrine kg. 87 an man a, he thil kaihhnawihah hian Mizoram mi pathum leh Silchar-a Mizoram Police Liason Officer leh constable pakhat man an ni.
Assam Police-te chuan Police Liason Officer chuanna leh a hnung zuitu lirthei pahnih car MZ 01/H - 2553 leh MN 02/A - 1419 te chu ringhlelin an lo dap a, car pahnih aṭang hian pseudoephedrine kg. 87 an hmu chhuak a, hei hi cheng nuai 35.67 hu a ni. Pseudoephedrine hi Delhi aṭanga Mizorama hralh tura lakluh tum nia hriat a ni.
Mizoram Police aṭanga thudawn danin, ruihhlo kaihhnawiah hian Zoramthanga (38), Lalramchhuana (23) leh Lalrinmuana (240, Zuangtui, Aizawl vek leh Silchar PLO Dipu Sharma leh constable Umesh Mishra bakah Suangothanga (36), Lianchungnung (37) leh Gouvung (30), Manipur vekte chu man an ni.
Silchar PLO leh Constable pakhat hi he thilah hian an inhnamhnawih leh inhnamhnawih loh chhui chian mek a ni a, Police motor-ah chuan ruihhlo hi an phur ve lo.
He thil thleng chungchangah hian Mizoram Police hotute chuan nimin khan Dholai PS an pan nghal a, thil tih ṭul pawimawh hrang hrangte an ti a, Silchar PLO motor chu ruihhlo phurhna atana hman a nih ve loh avangin an la chhuak nghal a ni.