NIT, Mizoramah Mizote'n Mizoram Quota an luah khat zo lo nasa ṭhin

National Institute of Technology (NIT), Mizoramah seat awm zawng zawng zinga a zatve (50%) chu Mizoram chhunga mite tan hauh a nih laiin, Mizo zirlaite'n an luah khat zo lo hle.

NIT, Mizoram hotute hnen aṭanga thu dawn danin, NIT-ah hian course panga a awm a, chungte chu - Electrical and Electronics Engineering, Electronics and Communication Engineering, Computer Science Engineering, Mechanical Engineering leh Civil Engineering-te a ni a; course tinah hian seat 30 zel awmin, chu'ng zinga seat 15 (50%) zel chu Mizorama mite tana hauh a ni.

Mizo zirlaite'n NIT, Mizorama B.Tech course hrang hrangah Mizoram quota an luah khah zawh loh nasat avangin NIT, Mizoram hian September 12, 2017 khan 'Opportunities for home state students at NIT Mizoram' tih thupui hmangin seminar an buatsaih hial. Hei hi NIT, Mizoramah Mizo zirlaite'n Mizoram quota an luah khah theih nana tih niin, higher secondary school hrang hranga science leh mathematics zirtirtute sawm khawm an ni.

NIT, Mizoram director Prof. Rajat Gupta chuan, NIT Mizoram chu Mizo­ram state chhunga mite tan a nih thu sawiin, Mizorama zirlaite'n an luah khat zo lo lutuk chu pawi a tih thu a sawi.