CM-in Thenzawla hnathawhte a tlawh
Chief minister Lal Thanhawla chuan Inrinni khan Thenzawla hmasawnna hnathawh tur hrang hrang a tlawh a, Horticulture minister PC Lalthanliana leh offcial-te'n an ṭawimawm.
Chief Minister hian Tribeni Construction Ltd.-te'n Central Agriculture University hnuaia College of Horticulture and Forestry-in an sak mek a tlawh a, project vil tura sorkar laipuiin a dah Rajesh Rjest Kanna (IES) leh contractor-te'n an lo dawng sawng a, an hnathawh meka harsatna an tawh hrang hrangte an lo hrilh a, March 1, 2017 aṭanga he hmunah hian class kal ṭan a nih theih nana Mizoram sorkar aṭanga mamawh an neihte an lo thlen.
College of Horticulture and Forestry tur sak mek enkawltute Chief Minister hnenah hian a panna kawng chungchang leh P&E department leh PHE lam aṭanga estimate bak a sira mimal ram neitute nena harsatna awmpalh thei chungchangte an lo thlen a ni. Hengte hi Chief Minister chuan a rang thei ang bera ngaihtuah a tum thu a sawiin, Thenzawl khawtlang hruaitute leh a chhehvela ram neitute chu hnathawktute lo ṭanpui turin a ngen.
College of Horticulture & Forestry atan hian Central Agriculture University chuan cheng vbc. 440 a ruahmana, phase 1 & Prefab Building sakna tur bik sum cheng vbc. 88 chu an release tawh a ni.
Chief Minister hian Incredible India programme hnuaia Integrated Development of New Eco-Tourism Destination under Swadesh Darshan-North East Circuit hmalaknaa 18 hole Golf Course hnathawh mek pawh a tlawh a ni. He hmalakna hi Ministry of Tourism hnuaia thawh niin project consultant chu Fore Consultant Private Ltd. an ni a, implementing agency chu Mizoram Tourism Development Authority an ni.
Golf Course atan hian formation cutting thawh a ni tawh a, cottage pawh Siberia aṭanga thing ṭha chi hmangin eng emawzat sak mek a ni. Tunlai hian ruah a tlak nasat avangin thawktute hi an chawl lailawk rih a ni.