Sik leh sa zirhona hun khar a ni

Sustainable Mountain Development Summit vawi 6-na (SMDS VI) Mizoram University-a neih chu September 23 tlai khan khar a ni a, governor Lt. Gen. Nirbhay Sharma-in a hmanpui.

Governor chuan SMDS VI thupui ‘Climate Change and Sustainable Mountain Cities’ chu thil pawimawh tak leh khawvel pawhin a buaipui em em a nih thu sawiin, "Himalaya tlangdung Jammu & Kashmir atanga Mizoram thlengin min nghawng vek a, chuvang chuan Nepal leh Bhutan te pawh tel ve se a duhawm hle," a ti.

Larsap chuan sik leh sa inthlak bakah khuarel chhiatna laka kan inpeih reng a ngai tih sawiin, "Disaster plan mumal tak leh disaster audit-te neih a pawimawh. Hasawnna tlo nei tur chuan kan khawvel ti chhe lo tawka leilung hausakna kan hman thiam a ngai a ni," a ti a, hmalakna hrang hrangah sorkar ringawt ring loa, mipuite inlungrual taka tel ve a pawimawh thu a sawi.

Khualzahawm Tripura Lok Sabha MP Jitendra Chaudhury chuan sik leh sa inthlak chung­chang chu khawvelin a buaipui ṭanna a la rei lo tih sawiin, "Kum 25 vel chauh sik leh sa inthlak hi buaipui a la ni. He mi chungchang hi mithiam­te zir bik tur a ni lo a, mi tin min nghawng avangin kan zir chian a, kan ṭanrual a pawimawh," a ti.

SMDS VI -ah hian Himalayan tlang dunga state hrang hrang aṭanga kal khawmte'n sik leh sa inthlak danglam zel chungchang an zirho a ni.