Bawngkawn ram sawifiah ngam loah puh

Congress ṭhalai chuan thuchhuah siamin, MNF president Zoramthanga chuan Bawngkawn ram mimal hnena hralh a nih chungchang sawifiah ngam loah an puh.

Congress ṭhalai tarlan danin, MNF Party-in total bandh September 14, 2017-a an buatsaih ṭumin, Mizo Hnam Runa thuthar thehdarhtute an kawmnaah MNF President hian 'Bawngkawn ram chungchang chu kar leh lamah document nen thlap press Conference ka ko ang' a ti a ni.

September 18-23 chhung MNF President chuan press conference a nei lo tluan ṭhak tih sawiin Congress ṭhalai chuan, "MNF President hian kar leh emaw 'remchang hmasa' tia a sawi tel kha a chhuanlam dawn em ni? 'Remchang hmasa' chu eng hun nge tih kan zawt nghal," an ti.

Congress ṭhalai dan-in a phal loh leh terms & conditions pawh Revenue Director leh MNF aiawhin an ziah fel tawh hnua MNF Party hruaitu ṭhenkhatin mipui chhawr tur kawngpui zauhna tur an lo hralh chu pawi an tih thu tarlangin, mipui ram hi a nihna tur dik taka hman a nih ngei theih nan an hralhna man pe leta sorkar hnena he ram hi hlan leh turin MNF hruaitute an phut.