NCC hotute'n CM an kawm

India hmarchhak biala National Cadet Corps (NCC) hotulu ber, maj gen. Raju Chauhan leh a thawhpuite chuan September 23 tlai khan chief minister Lal Thanhawla a bangla-ah a kawm a, NCC hmalaknate a sawipui.

Maj. gen. Chauhan chuan hmarchhak bialah Mizo ṭhalaiten NCC an phurpui bera, an la hlawkpui ber thuaia a beisei thu sawiin, "Mizo ṭhalaite chu duhsak an phu a ni," a ti a, chak zawka hmalak chhunzawm zel an tumnaah Chief Minister-in a thlawp ṭhat avanga lawmawm a tih thu a sawi.

Chief Minister chuan NCC hmachhawp langsar zual Lungleia NCC Batallion din, NCC Academy Tuirial a din leh NCC Air Wing Tuirial a din chung­changah eng chen nge hmalakna awm tawh tih a zawhna chhangin, NCC hotute chuan kumin chhung ngeia NCC hmachhawp pathum te chu tihpuitlin a beiseiawm thu an sawi.

Maj. gen. Chauhan chuan Mizoram district dangah leh ramri hrula thingtlang khawlian deuh­ahte NCC hmalak puiah Chief Minister chu ngenin, " NCC chu sipai ṭan tumte tan chauh a ni loa, mi puitling zawka ṭhalaite chherna hmanraw ṭha tak a ni," a ti.

NCC Air Wing a hman atan hian thlawhna pali a awm tawh a; thlawhna khalh dan zirna Flight Simulator pawh a dahna hmun remchang zawn mek a ni.