National Flag haltute man an ni

September 21, 2017 a Lunglei Venglaia National Flag haltu Lalrinawm­a, Samlukhai lehamah zuitu mi parukte chu Inrinni zing khawvar hma khan Samlukhai khuaah Sialsuk Police-te'n an man a, Lunglei Police-te hnenah an hlan chhawng.

Lunglei addl. SP J Lalmuankima sawi dan­in, Lalrinawma chuan tun hmain Mizoram hi tuma awpna hnuaiah a awm ngai lo, Pu Ch. Saprawnga-te hunlaiin India awpna hnuaia lut ta, tunah hian China ral a lo lian ang a, Mizoram hi India awpna lak aṭangin a zalen leh dawn a ni tih entirna atan, Nantional Flag hi an hal ta niin a sawi.

Lalrinawma hian Lunglei bakah hian Serchhip leh Lawngtlaiah National Flag an hal tawh thu police-te a hrilh.

Heng mite hi National Flag hal leh tihnawm­n­ah khapna dan, Prevention of Insult to National Honour Act, 1971 Section II leh Indian Penal Code hnuaia dan ding laite tlawh chhanin Lung­lei Police Station-ah thubuai siamsak an ni. Magistrate hmaa inlantir an nih hnuah magistrate thu angin District Jail-ah dah an ni.

Police-te sawi danin, Lalrinawma hian Pathian thu lama thil entir tur nei nia insawiin Samlukhai khuaah amah chu a nung chunga phum turin a thurualpuite a lo hriattir tawh a, an thil tih dan chu Sialsuk Police-ten an hriatin a hmuna enfiah turin an kal a, ram dan bawhchhiatna tling khawpa thil ti lo tura an hrilh hnuah leia vur loin thlan chhunga tih tur a tihkim thlengin a mu a ni.