Khawpui fai endik hna zo thawkhat

Mizoram sorkarin district headquarters leh khaw lian zual (census village) te faina kawnga inelna a buatsaih mek chu a endik tura ruatten an endik zo thawkhat a, la endik loh Kolasib leh Mamit district chu tunkar hian endik zawh a ni ang.

Sorkar laipui chuan nakkum 2018-a Mahatma Gandhi pianchamphaphak kum 125 lo thleng tur pualin India ram pum chu khaw fai tak a nih theih nan chak takin hma a la a, Mizoramah pawh Mizoram State Sanitation Task Force (MSSTF) district hqrs. leh khaw lian zualah faina beihpui thlak a ni.

Task force chuan pannel of expert mi paruk a ruat a, chung mite chuan khaw thlan bik endik hna an thawk a, khaw endikte tawhah chuan faina beihpui uar takin an thlak vek a ni.

He endiktu panel of experts for cleanliness competition ah hian convener-ah CCDU director Lalrothanga leh member secretary-ah UDPA jt. director James Lalnunmawia an ni a, member-te chu C Dorema (SIPMIU), Dr. Alfred Malsawmsanga (Mizoram Polution Control Board), Mina Zoliani (IPRO) leh Lal Rinmawia (MJA/Vanglaini) te an ni. Panel of experts veivak hi Dr. C Vanlalramsanga, Secretary, UD&PA in a vil a ni.

Penel of experts hi ṭhuang thumah an inṭhen a, team-I Dr. Alfred Malsawmsanga leh Lal Rinmawia te hian Siaha, Lawng­tlai, Tlabung, Lunglei, Hnahthial leh Thenzawl an endik. Team-II Lalrothanga leh Mina Zoliani te chuan Kolasib, Mamit, Zawlnuam, Vairengte, Kawnpui, Lengpui, Sairangn leh Bairabi endikin, team-III James Lalnunmawia leh C Dorema te chuan Aizawl, Champhai, Serchhip, Sai­tual, Khawzawl, Darlawn, Biate, Khawhai leh North Vanlaiphai an endik a ni.

Khawfai inelna lawmman hi category hnihah ṭhen a ni dawn a, rank-I hian Rs. 1,00,000/- ; rank-II in Rs. 50,000/-; rank-III in Rs. 30,000/- an dawng ang a, certificate an dawng vek bawk ang.

Panel of experts ten an fan tawhah official-te leh VC/YMA an thawkhho ṭha hle. Aizawl khawpui chhung bik chu Aizawl Municipal Corporation-in veng fai a thlang dawn a ni.