KHAWTHLIR

Aizawl Civil Hospital (ACH) Medical Superintendent chuan nimin khan thuchhuah siamin, OPD card chu bithliah awm loa pek chhuah leh a nih dawn thu a tarlang. Medical Superintendent hian July 9, 2020-a thupek chhuahah, ACH OPD card pek chhuah theih zat bithliah chu Human Rights, Fundamental Rights leh Supreme Court thutlukna kalh thei a nih avangin nimin aṭang khan sût a nih thu a tarlang a ni. 

Mamit DC Dr Lalrozama chuan nimin khan DC conference hall-ah Dashboard for Analytical Review of Projects Across Nation (DARPAN)/DM Dashboard a tlangzarh. DM Dashboard-in a thil tum ber chu - sorkar department-te hnathawh hmun khata awlsam zawka en lêt leh vil a nih theihna tur siam a ni. Online hmanga project kalpui mekte chu DARPAN-ah a lang zel dawn a, online-a kalpui lohte pawh dah luh theih tho a ni. 

Horticulture department chuan nimin khan Centre of Excellence for Fruits, Saichhoh, Haulawngah Lunglei district-a huan neitute leh department-a master trainner-te tan organic hmanga leiṭha siam dan zirna an buatsaih.

Aizawl DC chuan thupek chhuahin, July 27, 2020 aṭangin R Dengṭhuama Indoor Stadium-a Aizawl District Reception Centre chu zing dar 9 aṭanga zan dar 9 chhung chauh hawn a ni tawh dawn tih a tarlang. DC tarlan danin, Centre hi Pathianniah hawn a ni dawn lo a, state pawn aṭanga rawn lut turte chu Centre hawn hun chhunga thleng turin inruahman tur a ni.

July 23, Ningani khan ZMC Covid-19 Laboratory-ah mi 197 (mipa 139 leh hmeichhia 58)-te swab sample endik a ni a, Covid-19 vei hmuh thar an awm lo. Swab sample endik zingah hian ZMC-a thawk mi 49 an tel a; mi dangte chu Aizawl, Champhai, Siaha leh Khawzawl aṭanga an dawnte a ni. Nimin khan mi 203-te sample endik leh a ni a, he thu ziah lai hian result a la chhuak lo.