HTE Minister leh zirlai pawl hruaitute'n College admission chungchang sawiho

Higher & Technical Education minister Dr R Lalthangliana chuan July 23, Ningani khan a pisaah Mizo Zirlai Pawl leh Mizo Students’ Union hruaitute a kâwm a, college admission-ah zirlaite'n harsatna an tawh lohna atana hmalak dan tur a sawipui.

HTE Minister chuan, Co­vid-19 léngin kawng chi hrang hrangin ram leh mipui a nghawng tih sawiin, "Hriatthiam phak bâk leh beisei phâk loh thlengin min nghawng avangin hmalak pawh a harsa a ni. Hma lam hun hriat lâwk ni lo mah se, zirna chhunzawm vat beiseina rilru nen college admission tih ṭan a ni," a ti.

Hripui leng vangin Mizoram páwn aṭangin zirlai tam tak an rawn haw a, chu'ng zirlaite chuan phai lam boruak him chin hriat a nih loh avangin Mizoramah zirna chhunzawm an duh dawna a lan thu sawiin R Lalthangliana chuan, "College hrang hrangte insangmar a, kum dang aia zirlai admit tam tura kan ngen chungin thil buaithlak tak a ni thei dawn," a ti a; college-ah zirlaite an hnawn loh nan Mizorama sorkar college principal zawng zawng a sawipui tawh thu a sawi.

Dr R Lalthangliana chuan, Mizorama college-ah zirlai a tam thei ang ber admit dan tur ngaihtuah a ngai tih sawiin, "District hrang hranga college dinhmun zir chian mek a ni. College tinin zirlai an admit theih zat tihpun tumin ṭan an la vek a, mahse, eng chen nge an inpawh fàn theih ang tih hriat a ni lo. Zirlai lâk belh hian ken tel a nei thin bawk nen, ngaih­tuahna sên nasat a ngai hle a ni," a ti.

Sorkar thuchhuah tarlan dan­in, zirlai pawl hruaite chuan, kum dang aiin kuminah college zirlai an tam dawn avangin zirtirtu indaih lohna nasa takin a tizual dawn tih an sawi a, zirtirtu indaih lohna chu sutkian dan kawng awm se an duh thu Minister an hrilh.

Zirlai pawl hruaitute chuan, Aizawl páwn lama college-ah zirlaite'n admission an tih hreh loh a pawimawh thu leh chumi tur chuan ṭan tlàn a ṭul thu an sawi a; zirlai, ram leh hnam tana ṭha tur thilah chuan sorkar an thlàwp zel dawn thu an sawi bawk.

Meeting-a tel ve HTE department hotute chuan, Mizoram sorkar hnuaia college 21 a awm a, zirtirtu post ruak 235 a awm mek thu an sawi a, "Zirtirtu ṭhahnemngaite'n an hlawh thawh khawmin indaih lohna phuhru turin zirtirtu an ruai chhâwng hial ṭhin," an ti.