KHAWTHLIR

Missionary Day
United Penticostal Church (North East India) chuan nimin khan India hmarchhak pum huapin UPC Missionary Day an hmang. UPC (NEI) Missionary Day hi Aizawla UPC tualchhung kohhran tam zawk chuan awmni khamin an lawm a, kohhran eng emaw zat chuan ruai nen an lawm. Thingtlang lama kohhran tam zawk chuan nizan khan an hmang thung.

Thisen pe
Mizoram Polytechnic, Lunglei chuan nimin khan Lunglei Civil Hospital tan thisen unit 67 an pe a, a petute mipa 55 leh hmeichhia 12 an ni. Chanmari West Branch KṬP-in September 23, 2017 khan Aizawl Civil Hospital tan thisen unit 54 pein, a petute mipa 48 leh hmeichhia paruk an ni a; Chanmari Bial KṬP pawhin Synod Hospital tan thisen unit 32 an pe a, a petute mipa 28 leh hmeichhia pali an ni.

Pa khawi zir
Lawngtlai BDO hmalaknain nimin khan Pradhan Mantri Krishi Sinchayee Yojana – Watershed Development Component (PMKSY-WDC) hnuaiah pâ (mushroom) khawi dan zirna, ni thum awh tur chu Lawngtlai district KVK training hall-ah ṭan a ni; Thingkah leh Mampui-a self help group aṭangin pa khawi zir duh mi eng emaw zat an tel.

ZPM sawiho
Serchhipa Zoram Nationalist Party (ZNP), Mizoram People Conference (MPC) leh Zoram Exodus Movement (ZEM) hruaitute chu nimin khan PC Thankunga in, AOC Vengah an ṭhukhawm a, Serchhipa ṭangrual pawl - Zoram Peoples' Movement (ZPM) din dan tur an sawiho.

Zangnadawmna pe
Serchhip district-a PRRS vanga vawk chán chhungkaw 107 hnenah nimin khan Serchhip P&E Veng YMA Hall-ah zangnadawmna pek a ni a, DC Sangchhin Chinzah-in a hmanpui. Chhungkaw 107-te hian vawk 507 an chán a, a notê leh a ṭhang lai thi-ah Rs. 500 zel leh a puitling thi-ah Rs. 1,000 zelin zangnadawmna pek a ni.