Mizo Archaeological Society din a ni

Nimin khan minister Zodintluanga pisaah Mizo Archaeological Society (MAS) din a ni a, hruaitu turte an inruat nghal. Zo­dintluanga chuan, "Kan pi leh pute sulhnu tha taka vawnhim hi Mizote mawhphurna a ni," a ti.

MAS hi Mizo pipute sûlhnu (archaeologicaol site and remain)-te humhalh a, zir chian leh enfiah kawnga hma la tura din a ni a, Mizoram University leh college zirtirtute bakah, thil hlui vawn ṭhat kawnga tui leh ṭhahnemngaite an tel. An pawl lungphûm chu - Mizo pipute sûlhnu dik tak humhalh leh vawn ṭhat bakah, a nihna dik tak mipui hrilhfiah kawnga hmalak a ni.

MAS patron atana an dah Zodintluanga chuan, Mizo pi leh púte sûlhnu chu vawn ṭhat a, Mizo history dik tak mipuiin an hriat theihna tura hmalak chu Mizote mawhphurhna a nih thu a sawi a ni.

MAS hian kumin chhungin Champhai district chhung leh Sailulak khaw ram chhung­a archaeological site report siam te, mipui náwlpui zirtir nan workshop leh awarenenss programme neihte an tum.

Mizo Archaeological Society-ah hian president atan Dr Malsawmliana, T Romana College leh secretary atan Joseph Lalzar­liana, MZU-a assistant professor an ruat a; hruaitu dangte an ruat bawk.