NERLP hnuaiah computer sem

North East Rural Livelihood Project (NERLP) aṭangin nimin khan Hnahthial RD Block hnuaia federation thlan chhuah pasarihte hnenah an hna thawhna tur computer leh printer hlan a ni. Hlanna inkhawm hi Ebenezer Computer Centre, Hnahthialah neih a ni a, federation pasrih hnenah hian Rs. 3,50,000 hû computer pek a ni.

NERLP Hnahthial Block coordinator C Lalremsanga chuan, an hnuaiah self help group (SHG) 416 an awm mek thu leh, SHG 416-te chu federation 25-ah an inchhùn khawm thu a sawi a, "SHG leh federation-te hi an thawk ṭha hlawm hle a, tunah hian cheng nuai 7 chuang nei pawh an awm nual tawh a ni," a ti.

NERLP Hnahthial Block kaltlang hian ṭhalai 80 vel chu skill development hrang hrang - medical, aviation, hotel management, electrician, tailoring leh thil dangte zir turin tirh chhuah an ni tawh a; chu'ng zinga mi 20 vel chuan eizawn nan an hmang tawh niin C Lalremsanga chuan a sawi.