Covid-19 do nan sum thawh a ṭul chuan Minister/MLA-te'n hma kan hruai tur a ni - Congress Legislature Party

CLP hian an leader Zodin­tluanga hmingin thuchah an tichhuak a, "Mizoram sorkar hnathawk group A, B leh C-te'n an hlawhpui (basic pay) aṭanga 10% leh group D-te'n 5%, thla riat chhung sorkar sum báwma thawh an tumnaah an inhuamna a ropui kan ti. Mizoram sorkar hi sum leh paiah a harsa tak tak a nih a, ṭanpui a ngai a nih chuan minister leh MLA rualte hi a che hmasa ber tur, hlawh aṭanga sum thawh hmasa ber tur kan ni-ah kan ngai," an ti.

Financial year 2019-20 budget aṭangin Mizoram sorkarin SEDP-ah ringawt pawh cheng nuai 18,837.28 hman loh a la neih thu tarlangin CLP chuan, "Hei hi lapse thei a nih loh avangin hman theih a la ni. Central sorkar leh NEC aṭangin cheng vaibelchhe eng emaw zat a dawng bawk," an ti a; Covid-19 do nan Mizoram budget an hmang nia sorkarin a sawi pawh kum 2020-21 budget pumpui cheng vbc. 10,715 aṭangin tlem tê a la nih thu an tarlang.

CLP chuan, Mizoram sor­karin a duh phawt chuan project ṭhenkhat atana sum a dah tawhte chu Covid-19 do nan a hmang thei tih sawiin, "Sorkar hnathawk hlawh tibuai rih lo hian Mizoram sorkar sum báwmpui aṭang hian ruahmanna a la siam thei a ni tih hi kan ngaihdan a ni," an ti.

Chief minister Zoramthanga'n awihawm loh khawpa sum tam tham Mizoram sorkara a luh tur thu te, a ṭhen phei chu rin loh lam aṭanga sawi chhuah ngam loh khawpa tam a nih tur thute a sawi tih tarlangin, "Chanchinbumite hmaah ngei pawh Covid-19 dona atan pawisa limit a awm loh tur thu a lo sawi tawh a ni," an ti a; chutiang a nih laia sorkar hnathawk, Covid-19 dona kawnga frontline-a awm Health leh Home department-a thawkte huama sorkar ṭanpuina tur chhûn luh a ngai chu pawi an tih thu an tarlang.Mizoram sorkar chu sum leh paiah a harsa tak tak a nih chuan Finance changtu Chief Minister-in a sawi chhuak mai tur a nih thu tarlangin CLP chuan, "A ṭul a nih chuan special assembly session pawh koin, kan budget-te pawh re-appropriate theih a ni. State sorkarin Covid-19 vanga harsatna a tâwk tak tak a nih chuan CM, minister leh MLA-te kan che hmasa tur a ni a, a ṭul a nih chuan kan hlawh cut mai bakah, MLA fund thleng pawhin sorkarah kan pe mai turah kan ngai. Chutiang tur chuan kan inhuam reng a ni," an ti.

    Sorkar hnathawkte pawisa dil hmain MLA leh Minister-te'n thawh phawt ang u.

    2019-20 budget-a SEDP-ah ringawt pawh cheng nuai 18,837.28 hman loh a la awm, hei hi a duh chuan sorkarin a hmang thei.

    Sorkar-in 2020-21 budget cheng vbc. 10,715 aṭangin Covid-19 dona'n tlem tê chiah a la hmang.

    Sor­karin a duh phawt chuan project ṭhenkhat atana sum a dah tawhte chu Covid-19 do nan a hmang thei.

    Sorkar hnathawk hlawh tibuai loin sorkar sum bawm aṭangin a la kal theih ang.

    CM-in Covid-19 dona atan sum limit a awm loh thu a lo sawi tawh.