Mizo prose writing chungchang zirho

Mizoram University (MZU)-a Department of Mizo, All India Tribal Literary Forum (AITLF) leh Ramnika Foundation, Delhi ṭangkawp chuan nimin khan Synod Conference Centre-ah ni hnih awh tur,

'National seminar on Mizo Prose Writings' an buatsaih a, minister Lalsawta'n a hmanpui.

Lalsawta chuan, Mizo thu leh hlaa mi ngaihsanawm leh sûlhnu pawimawh tak tak hnut­chhiahtute chawimawina hun hman a ni chu lawm­awm a tih thu a sawi a, "Ṭhangtharten ‘Ka peih lo’ tih kan awlsam lutuk hian Mizo work culture a ṭha lo zawngin a nghawng a ni. Hlawhtling tur chuan kan thiltihna apiangah taimak leh teirei peih a ṭul," a ti.

Lalsawta chuan, Mizo zirlai leh researcher kal khawmte chu an chawimawite anga Mizo thu leh hla tihausatu leh tihmasawntu nih tum ṭheuh turin a chah.

Minister hian Prof. Laltluangliana Khiangte, MZU-a Mizo department HoD buatsaih, ‘History of Mizo Literature Bu Thar’ leh ‘ZA-THUM’ tihte a tlangzarh nghal a ni.

Seminar-ah hian Rev.Dr Zairema, C Rokhuma leh R Zuala te chanchin leh an thuziahte zirho a ni a; naktukah Pachhunga University College seminar hall-ah chhunzawm a ni ang.