Covid-19 do nan sorkar hnathawkte'n Thla 1-ah vbc. 21 chuang thawh dawn

Covid-19 dona atana Mizoram sorkar hna­thawkte'n an hlawh aṭanga thla tin pawisa an thawh khawm tur chu thla khatah cheng vbc. 21 chuang a ni dawn. Contract leh mus­ter roll employee-te leh Federation of Mizoram Samagra Employees (SSA leh RMSA hnuaia thawk) te pawhin an hlawh aṭangin an thawh ve dawn a ni.

Tarlan tawh angin, Chief Secretary hoa May 5, Thawhlehnia sorkar hnathawk pawl hrang hrang aiawhte inhmu khawm chuan an basic pay aṭanga chhûtin May aṭanga December thleng pawisa an thawh dawn a; group A, B leh C-te'n thla tin 10% leh group D-te'n 5% an thawh dawn a ni. Hetih lai hian, sorkar hnathawk ṭhenkhat zingah an hlawh aṭanga sum thawh dan tura thutlukna sawisel an awm nual. 

Finance department aṭanga Vang­lai­ni-in thu a dawn danin, sorkar hnathawkte sum thawh tur chu chhût fel a la ni lo a; mahse, thla khata an thawh tling khawm tur zat chu cheng vbc. 21 a chuang dawn. Sorkar hnathawkte sum thawh tur hi an thawh hun tur thla riat chhungin cheng vbc. 160 chuang a ni ang.

Meeting-a an rèl dan chuan, contract leh muster roll employee-te leh Federation of Mizoram Samagra Employee-te pawhin an hlawh aṭangin an thawh ve dawn a, an thawh zat tur erawh chu Finance department chhût chhuah tura dah a ni. Tunah chuan Finance department-in an la chhût chhuak lo.

Hetih lai hian, Thawhlehnia meeting-a sawi lan tel loh, Mizoram sorkara secretary leh a chung lam zawngte chuan May-December chhungin an hlawhpui (basic pay) aṭanga 15% chu thla tin Covid-19 dona atan an thawh dawn bawk.

Sorkar official pakhat hnen aṭanga thu dawn danin, Thawhlehnia meeting chuan sorkar hnathawkte'n an hlawh aṭanga an thawh sumte chu langtlang taka hman an duh a, head hranpa siam loin, Chief Minister's Relief Fund-ah emaw, consolidated fund-ah emaw dah mai ṭha an ti a ni.