Chanchinbu pahnih lakah PWD SDO-in FIR a thehlut

PWD Kawnpui Sub-Division-a SDO H Lalrotluanga chuan, Kawnpuia ni tin chanchinbu 'Chhuahtlang' leh Kolasib-a ni tin chanchinbu 'Kolasib Aw' te chu thu dik lo an chhuah nia ngaiin an lakah July 23, Ningani khan Kawnpui Police Station-ah first information report (FIR) a thehlut.

PWD SDO H Lalrotluanga chuan a FIR-ah chuan, July 22, 2020-a chhuak Chhuahtlang leh Kolasib Aw chanchin­bute chuan PWD Kawnpui Sub-Division chu thu dik lo hmangin an chhuah mualpho niin a tarlang a, "Thu dik lo hmanga min timualphotute hi zawng chhuak a, an phû tâwk an chungah action min laksak ngei turin ka rawn ngen a che," a ti.

H Lalrotluanga tarlan danin, Kawnpui-Hortoki kawng chu km. 0-12 inkar chu North Eastern Frontier Railway kutah hlan a ni tawh a, PWD Kawnpui Sub-Division chuan km. 12-18 inkar an enkawl a ni. PWD-in an enkawl chin chu July 4, 2020-ah kawngba sâm leh tuihâwk luankawr (side drain) tihfai (clear) vek a ni tawh a; hnatlangin an tihfai lai chu Railway enkawl chin a ni.

PWD SDO H Lalrotluanga chuan, "Hetianga thu dik lo hmanga chanchinbu leh social media lama min timualpho chiam mai hi hriatthiam harsa kan tiin, thu dik lo hmanga min puhtute hi min zawn chhuahsak a, an phû tâwk hremna min peksak ngei turin ka ngen a che," tiin FIR-ah a ziak a; document hrang hrang a thil tel bawk.

Hetih lai hian, Kolasib Aw editor C Zomuanpuia chuan, Kawnpui-Hortoki inkar kawngpui sîra hnim (kawngba) sâma Hortoki maxicab driver-te an hnatlàn chung­chang chanchinbuah an ziak tih a sawi a, "Hman ní khan SDO hian min rawn phone a, kan source min zawt a, kan hrilh ngai loh thu ka sawi. Tihdikna min siamsak la an ti leh a, tehreng mai tiin a tûkah an duh angin kan tihdikna kan chhuah tawh a, tuna FIR an rawn tharthawh leh hi a mak ang reng viau mai," a ti.

Kolasib Aw chanchinbuah hian 'KAWNG BA VAI FAI' tih thupui hmangin hetiang hian chhuah a ni a: "Nimin (July 21) khan Hortoki Sumo driver-te chu an khaw kawngpui sir hnim samin, a ni 3-na atan an hnatlang leh. He kawng hi PWD, Kawnpui Sub-Division enkawl lai niin, kawngsir a hnim nasat avang hian passenger te chuan sumo chhungah vangvat te pawh an kai ṭhin niin an sawi a, department lamin an tihsak theih loh avangin driver te hian service ṭhulhin kawngsir hi an vai fai a ni," tiin.