Haw tharte'n Covid-19 an vei lo

Hmarchhak state-a tangkhang zinga tun hnaia Assam aṭanga rawn haw, Lawngtlai district leh Mamit district mi, Covid-19 kai palh theia ngaihte chu Zoram Medical College (ZMC) Covid-19 Testing Labo­ratory-a endik an nih hnuah hripui an vei lo tih hmuh a ni.

Sorkar thuchhuah tarlan danin, Lawngtlai district mi, Assam aṭanga hawte zinga mi pathum chu rapid test kit (RTK) hmanga endiknaah result a chian loh avangin Zoram Medical College (ZMC) Covid-19 Testing Laboratory-a endik turin an swab sample thawn a ni a, May 5, Thawhlehni zan khan result chhuakin, Covid-19 an kai lo vek tih finfiah a ni.

May 3, 2020-a Guwa­hati aṭanga haw Mamita quarantine centre pakhata awm mek pakhat pawh rapid test kit hmanga enfiah­naah a result a chiang tâwk loa hriat a nih avangin ZMC Laboratory-a endik turin May 5, Thawhlehni tlai khan State Referral Hospital-ah thawn a ni a; nimin khan result hriat nghal niin, Covid-19 an kai lo.

Mamit DC Dr Lalrozama chuan zawhna chhangin, ZMC Laboratory-a endik tura Mamit aṭanga an thawn chu a swab sample ringawt thawn loin, Mamit aṭanga kal a harsat loh avangin amah (mihring) thawn a nih thu a sawi. High Risk Ward-ah admit a nih thu tarlan a ni bawk.

ZMC Laboratory-ah hian Thawhlehni tlai aṭanga nimin tlai thlengin sam­ple pasarih endik a ni a, Covid-19 an kai lo vek. A pumpuia Mizorama sample endik tawh zat chu 195 a ni. Rinhlelh thilah State Referral Hospital-ah Thawhlehni tlai dar 5 leh nimin tlai dar 5 inkarah khan mi panga dah luh an ni a, make shift ICU ward-ah pahnih leh holding ward-ah pathum an awm.

Screening point hrang hranga enfiah tawh zat chu 77,508 niin, chu'ng zinga 454 chu nimin lama enfiah an ni a; nimin lama Rapid Anti Body Test neih zat 143 leh RT-PCR test zat pali a ni. Quarantine centre-a dah thar mi 65 an awm a, home quarantine-a awm thar mi 22 an awm bawk.