Aizawlah 5-star hotel din tum a ni - Tourism Minister

Tourism minister Robert Romawia Royte hoin July 23, Ningani khan a pisaah Mizoram Responsible Tourism Policy 2020 duan mek chungchang sawiho a ni. Minister chuan, Aizawlah 5-star hotel din tum a nih thu leh Mizo ṭhalai 20 vel chu sorkar ṭanpuinain tour guide (khualzinte kaihruaitu) zirtir tum a nih thu a sawi.

Robert Romawia chuan, "Mizoramah sorkar hriatpui tour guide mumal an awm loh avangin tourist-te'n harsatna an tâwk fo a, chuvangin Mizo nula tlangval 20 vel chu sorkar ṭanpuinain tour guide training tír tum a ni," a ti. Mizorama sum hmang tam thei tur leh hnem­hnànpui tham khualzin híp turin star rated hotel a pawimawh tih sawiin Tourism Minister chuan, "Aizawlah 5-star hotel din tum a ni," a ti a; 5-star hotel din a nih chuan sorkar tan sum lâk luhna ṭha a nih ngei a rin thu a sawi.

Tourism Minister chuan, tunlai mamawh milin Mizoram Tourism Policy siam thar a ṭul a, hmalak mek a nih thu sawiin, "Planning Commission hun lai leh NITI Aayog pawhin Mizoram hmasawnna thlen theitu pawimawh chu tourism sector a nih thu an puang a, hmasawnna tluantling a taka a thlen theih nan leh central sorkar leh funding partner dangte puihna dawng thei tura tourism policy siam thar hi tihmâkmawh a ni," a ti.

Meeting hi Tourism secretary Esther Lalruatkimi'n a kai­hruai a; sorkar official-te bakah, tour operator, tic­ket agent leh hotel neitu pawl aiawhte an tel. Tourism deputy director Alan Lalthanzara'n draft policy a sawifiah a ni.