Kânhmunah hmanraw ṭha dah ve an duh

Taitesena Group YMA chuan Mizoram khawthlang lam, Kanhmun leh a chhehvelah state pawn aṭanga bungraw lutte a him zawk theih nan hmunhma leh hmanraw ṭha zawk dah turin Mizo­ram sorkar an ngen.

May 4, 2020-a Ngurlianthanga Hall, Kawrthaha Taitesena Group YMA hruaitute ṭhukhawm chuan, Mizoram sorkarin mipui mamawh lâk luhna tura Kanhmun kaltlanga Tripura leh Assam kalna kawngkapui an hawng chu lawmawm an tih rualin, Kânhmun khuaa hmanraw awmte chu an duhkhawp loh thu antarlang a; hmunhma leh hmanraw ṭha zawka thuam turin sorkar an ngen a ni.

Taitesena Group YMA chuan, "Mizo mipui himna atana tlangval tlawmngaite riahbûk sual chawpa an rammut laia Mizoram sorkarin mipui mamawh chi hrang hrang leh state danga mipui tangkhangte luhka atan facility (hmanrua) ṭha awm lohna Kanhmun khua a thlang hi him tawk loa hriain, ṭha kan tih loh thu Chief Secretary hnenah ziakin an thehlut a ni," a ti.

Taitesena Group YMA hian Vairengte, Bairabi leh ramri hmun danga quarantine centre leh sani­tising facility sorkarin a dah ang Kanhmunah dah ve turin sorkar an ngen a; sorkarin a dah thei lo a nih chuan Kanhmun kaltlanga state dang kal pawhna kawng chu hawn rih loh an duh.

An hmalakna leh duh dante chu Taitesena Group YMA hruaitute chuan May 4 zan khan Kanhmunah Langkaih Group YMA hruaitute pawh an sawipui a; Taitesena Group-in sorkara an thlen chu Langkaih Group pawhin 

ṭha an ti a, an thláwp a ni.

Taitesena Group YMA president Darthangliana chuan sorkara an thil thlenah hian sorkar aṭangin chhânna an dawng tawh tih an sawi a, Mamit DC-in hma a la mek tih sawiin, "Motor phuh thianghlimna tur damdawi a chah mek a, a la thleng lo. PHE lamin a phuhna tur hmanrua Phaizauah an siam mek," a ti.

Taitesena Group YMA President-in Vanglaini palai a hrilh danin, Kânhmun bulah Forest department in lian ṭha tak a awm a, chutah chuan Tripura leh Assam aṭanga bungraw lut reng reng chu ni thum chhung dah phawt zel tura ruahman a ni.

Kawrtethawveng pa-in a ramah Tripura lama Bru-te lo a neihtir avangin May 5, Thawhlehni khan Tripura-a Bru mi ṭhenkhat chu Mizoramah an rawn feh tih sawiin Darthangliana chuan, "Task force duty-te'n an ûm haw nghal. Lo neihtirtupa hi kan kâwm nghal a, state ramri kâna inkalpawh phal a nih loh avangin FIR thehluh a ni," a ti a; police-in thu an zawhfiah an beisei thu a sawi.

Taitesena Group President sawi danin, Kanhmun khawlaia Langkaih lei chu an la khâr ṭha a, khaw dáia Medili lei erawh sorkar thu angin hawn a ni tawh. Mizoram chhunga Tripura state hnaihah Bru khua eng emaw zat a awm a, chu'ngah chuan Bru ho duty ve mah se, Taitesena Group chuan Bru-te chauh duty chu an rin tâwk loh avangin Bru khuaa duty turin May 5 khan Mizo 27 an intîr lut a ni.

Tripura depa khua - New Eden leh Tumpánglui khuaah Tuidam Branch YMA-in a hma aṭangin duty tur mi an tír lut tawh a; Assam ramri depa awm Kolalian khuaah May 5 aṭangin Darlak YMA-te an duty ṭan a, May 9 aṭangin Darlak, Serhmun leh Nalzawl YMA-te'n an chhâwk ang. Mualṭhuam khua aṭangin tun hnaiah Tripura-a kal an awm avangin Mualṭhuam chu kar khat chhung an khârkhip bawk.

Darthangliana chuan, Tripura-ah Covid-19 kai pung tial tial mah se, Mizoram khawthlang lam aṭangin Mizoramah hripui a luh loh nan theihtawp an chhuah zel thu a sawi a, "Theihtawpin kan fimkhur reng a, tunah hian DC thu kan nghak mek. He lam aṭang chuan Mizoram mipuite thlaphâng lo turin kan chah a ni," a ti.