Mizorama khelmual 16 zinga 15-ah Decor India in phûl lem an phah dawn

Mizoramah June 30, 2020 aṭanga July 13, 2022 thleng khan khelmual 16-ah cheng nuai 9,432.54 man phûl lem phah hna thawh a ni a, khelmual 16 zinga 15-ah phûl lem phah hna thawk turin M/s Decor India, GS Road, Guwahati thlan a ni.

RTI Act hmanga zawhna Mizoram State Sport Council (MSSC) SPIO-in a chhan danin, kum 2019-2022 chhungin Mizoram hmun 16-ah phûl lem phahna tur lungphùm phùm a ni a, a vaiin cheng nuai 9,432.54 man a ni. Phûl lem phahna sensoah hian site development work - earth work, fencing, retaining wall, goal post, etc. a tel.

Phûl lem phahna tur hian tender chhuah a ni a, restricted tender hmangin thawktu tur thlan a ni. Hmun 16-a phûl lem phah tur zinga hmun 14 chu M/s Decor India, Guwahati-in an thawk dawn a, an thawh tur zawng zawng chu cheng nuai 8,485.89 man a ni.

Decor India-in anmahni chauhin hmun 14-ah phûl lem an phah dawn bakah, hmun dang pakhatah pawh company/firm dang nen an thawk dawn. District Sports Complex, Lunglei chu Leitlang Consultant leh Decor India ten cheng nuai 457.72 hmangin an thawk dun dawn a; Mamit district-a Tuidam Artificial Football Turf erawh chu Creative Minds, Chanmari West-in cheng nuai 488.93 hmangin an thawk a ni.

Phûl lem phah tur hi contrac­tor-te'n ACT GLOBAL Sports, USA aṭangin an lei thu SPIO chuan a tarlang a; phûl lem phah tura hmachhawp a awm leh awm loh leh, phahna tur hmun zawhna chu, "Awm e, Kawnpui Field No-II' tiin a chháng.

MSSC SPIO tarlan danin, phûl lem phahna tur hmun 16 zingah mi, Tuidam Artificial Football Turf chu May 10, 2021-ah hna thawh ṭan niin, August 25, 2022 khan thawh zawh a ni.

Lengpui (Aizawl district), Tuidam (Mamit district), Chawngte (Lawngtlai district), Kawrthah (Mamit district) leh Muallungthu Football Ground (Aizawl district)-ahte phûl lem phah ṭan a ni tawh a, zawh a la nih loh thu a tarlang bawk.