Performance Grading Index-a district dinhmun ṭha lo chungchang sawiho

Governor Dr Hari Babu Kambhampati chuan nimin khan Raj Bhavan-ah School Education department hotute a kawm a; Performance Grading Index (PGI) tihchhuah hnuhnung bera Mi-zoram district ṭhen­khat dinhmun ṭha lo chungchang leh ṭan lak ngai laite a sawipui.

Inkawmnaah hian School Education secre­tary Dr Lalzirmawia Chhangte, director Dr H Lalthlangliana, SCERT acting director Dr A Lalchhandami leh Samagra Shiksha state project director Lalhmachhuana te an tel a; Secretary-in department dinhmun a lem nen a sawifiah.

School Education Secretary tarlan danin, PGI 2018-19 overall score-a hniam fál district pathum an awm a, chungte chu Mamit (126), Serchhip (125) leh Lawngtlai (106)-te an ni. PGI 2019-20 score-ah chuan Serchhip leh Lawngtlai district-te'n hma an sâwn hret a, Mamit district erawh a ṭha lo zui zel (136) thung.

School Education hotute sawi danin, district pathumte'n a taka an hnathawh ṭhenkhatte report thehluh loh an nei ṭhin tih hmuh a ni a, tehfung danga an hniam chhan pawh tarlan a ni.

Dr Hari Babu Kambhampati chuan, sikul viltu officer-te leh headmaster-te mawhphurhna kenkawh chungchangah zirtirna ṭha zawka pe turin School Education hotute a chah a; sorkar laipui hmalakna leh hmasawnna tehna chi hrang hrangah report kimchang taka pek leh information thehluh ngaite a hun taka thehluh a pawimawh thu a sawi.

Governor chuan, PGI chu a pawimawhzia headmaster leh headteacher-te'n an hriat chian a rin loh thu leh chumi avanga report awm lo a nih theih thu a sawi bawk.

School Education department hotute sawi danin, sikul 208-ah smart classroom siam tuma hmalak mek a ni. Smart classroom-ah hian interactive board hman a ni dawn a, kumin aṭangin sikul a tam thei ang ber internet peka digital class neihpui tum a ni. Tun dinhmunah Mizorama sikul zinga 20% velin internet an pawt a ni.