Healthcare bill tur sum pek a ni ; June 2021 a la daih kim dawn lo
Mizoram sorkar chuan tun hnai khan Mizoram State Health Care Scheme (MSHCS) hnuaia damlote bill tur sum a pe chhuak a, mahse, June 2021 thlenga bill lutte a la daih kim dawn lo.
Vanglaini thu dawn danin, damlote inenkawlna senso phuhrukna atan MSHCS-ah Mizoram sorkarin tun hnai khan cheng nuai 400 a pe chhuak a; MSHCS chuan damlote hnena sem chhuah turin buaipui ngaite an buaipui mek a, pek chhuah thuai beisei a ni.
Cheng nuai 400 hian June 2021 thlenga bill lutte a la daih kim dawn lo a; cheng nuai 400 pek chhuah zawh a nih hunah pawh Mizoram sorkar chuan health care bill June 2021 thlenga lut ṭhenkhatte bakah, July 2021 leh a hnu lama bill lutte a la ba dawn tihna a ni.
RTI Act hmanga zawhna Health & Family Welfare department-in August 2022 laihâwla an chhan danin, health care bill ba cheng vbc. 74.04 a awm a, chumi hnuah pawh bill eng emaw zat a luh belh leh tawh.
Hetih lai hian, MSHCS hnuaia inziak lut zat a tlahniam hle a; October 1, 2019 leh September 30, 2020 chhung atana inziak lut chhungkua 1,13,720 an awm laiin, October 1, 2021 leh March 3, 2022 atana inziak lut chu chhungkua 87,695 an ni a, kum kal mek April 1, 2022 leh March 31, 2023 chhung atana inziak lut zat phei chu chhungkua 39,505 chiah an ni tawh a ni.