Inthlan awm tur hi ram anga chhiat hlenna leh dinchhuahna hriltu a ni dawn - Lalsawta
Mizoram Pradesh Congress Committee (MPCC) president Lalsawta chuan, kum 2023-a Mizoram inthlanpui awm tur chu Mizoram tan ram anga chhiat hlen theihna leh dinchhuah leh theihna hriltu tur a nih dawn avangin theihtawp chhuaha ṭan lak a ngaih thu a sawi.
Aizawl City Block Mahila-in nimina Lal Thanhawla Audito-rium-a Conference cum Political Training an buatsaihah thu sawiin Lalsawta chuan, "Kum 2023 inthlanpui hi keini Congress party tan mai ni loin, Mizoram tan ram anga kan chhiat hlen theihna emaw, kan din chhuah lehna emaw a nih dawn avangin theihtawp chhuaha ṭan lâk a ngai a ni," a ti.
Lalsawta chuan, Mizoram sum leh pai dik lo taka chhêk khawltute'n inthlan hunah an sum hman ṭangkai an tum tih sawiin, "Party ṭhenkhatte'n vote (mihring) leiin an sum chu an lungmuanpui. Hei hi Congress party chuan kan duh lo a, sum hmanga lei tumtu che an awm a nih pawhin an pawisa lo lak sak suh u, pawisa kan laksakte hnena rinawm loh hi kan duh lo," a ti a; vote lei tumte chu lo tizak turin an party mite a chah.
Mizorama Congress mipuite chu an candidate tura beiseite leh an hotute lakah insúm tura chahin Lalsawta chuan, "A theih phei chuan inthlan kaihhnawih thilah hian keimahni lamin senso mamawh lo phuhrûk theih i tum zawk ang u. Pathian chakna aia sum chakna ringtute ai chuan Congress mipui chu kan danglam ngam tur a ni," a ti.
Mizoram Pradesh Mahila Congress Committee president Vanlalawmpuii Chawngthu kaihhruai inkhawmah hian MPCC treasurer Zodintluanga Ralte, MLA pawhin thu sawiin, "Kan ram tana rotling zawng zawng hi Congress hnathawh vek a ni," a ti a; Congress sorkarah nasa takin ram tan an theihna an hlan thu a sawi.
Zodintluanga chuan, medical college nei turin theihtawpin an sual a, MIMER an din chu a tiṭhuanawptute'n ZMC tia an thlak thu sawiin, "ZMC tia a hming an thlâk chu central sorkarah an zuar leh mek tawh. Aizawl Bazarpui sakna tur sum Congress sorkarin kan dah sa vek tawh pawh tun thlengin an la sa ṭha duh lo a ni," a ti.
Mahila-te resolution pass
1) Hmeichhiate'n ram leh khawtlang rorelnaah dinhmun pawimawh kan chelh ve theihna turin village council, local council leh Aizawl Municipal Corporation-ah a bika chanvo (reservation seat) min siamsaktu chu Congress sorkar a ni
2) Nupa inṭhen thuah hmeichhiate'n hamṭhatna kan neih ve theihna tura nupa inṭhena rosum insem dan tur (The Mizo Marriage, Divorce and Inheritance of Property Act, 2014) min siamtu pawh Congress sorkar a ni. Hmeichhiate tan dinhmun ṭha min siamsaktu leh hmeichhiate ngaihsaktu Congress party kan nei hi lawmawm kan ti
3) Congress sorkarna hnuaiah khan Mizoramin hmasawnna tam tak kan nei a, sorkar hnathawkin a hun takah hlawh leh an GP fund an la thei a, an pension rualin pension pawisa an lak chhuah ṭhin bakah, Mizoram mipuite'n kan chanvo dik tak kan hmu ṭhin
4) Tuna kan sorkar hrawn mek (MNF) in sum an enkawl thiam loh vanga hun rei lote chhunga sorkar leiba tam lutuk kan neihna lak aṭanga kan ram chhan chhuak a, Mizoram mipuiin kan mamawh ber chu ram mipui sum enkawl thiam, kuthnathawktute tana hamṭhatna siam theitu tur leh hlemhletna ti bo turin Lalsawta kaihhruai sorkar ṭha kan neih theih nan theihtawp kan chhuah dawn