New Market chungchang sorkarin a sawifiah 'Agreement ziah zawhah hna ṭan nghal a ni ang'

UDPA department chuan Aizawl New Mar­ket building ṭhiah leh a thar sak tur chungchang sawifiahna an tichhuak a; September 22, 2022 khan Lushai Engi­neers hnenah Letter of Acceptance (LoA) pek a nih thu leh Lushai Engineers-in performance security an thehluh veleh contract agreement ziah a nih dawn thu an tarlang.

New Market sak a hmanhmawhthlak tawh avangin chak zawka hna thawh a nih theih nan contractor thlanah Aizawl Smart City Limited a fimkhur hle niin UPDA chuan a tarlang a, "Restricted tender chhuah a nih hnuah technical leh financial bid hi firm pathum aṭanga dawn a ni a, Aizawl Smart City hnuaia Bid Evaluation Committee-in uluk taka a endik hnuah a chháng hniam ber Lushai Engineers hnenah Letter of Acceptance (LoA) chu 22.9.2022 khan pek a ni. Lushai Engineers hian performance security an thehluh veleh contract agreement sign a ni ang a, hna ṭan nghal a ni ang," an ti.

UPDA department tarlan danin, New Market building sak ṭhat tur chu Aizawl Smart City hnuaia thawh tur a ni a, project hming chu 'Modernisation of Bara Bazaar - Trade Facility-cum-Exhibition Areas' tih a ni. Design siam turin intihsiak buatsaih a ni a, Catalyst Architecture thlan a ni.
Bazarpui in pui ber tur sak dan tur design uluk taka endik hnuah a sakna tura sum ruahmanin a daih dawn lo tih hriat chhuah a ni a, chumi siam rem tur chuan Aizawl Smart City Ltd. leh Project Management Consultant (PMC) leh Catalyst Architecture ten sum ruahman an en ṭha leh bawk.
New Market hi Commerce & Industries department enkawl a ni tih sawiin UDPA department chuan, "Aizawl Smart City Ltd nen an inberâwn reng a, ṭhutna (seat) awm tur zatte vawi eng emaw zah tihdanglam a nih avangin DPR final chhung hian hun a duh viau. Vawi eng emaw zah sawiho hnuah DPR amount hi cheng vbc. 42.83 a ni ta a, Mizoram sorkar chuan March 2022 khan approval a pe," an ti.

NEW MARKET THARA AWM TURTE (UDPA department tarlan angin)
1. Seat awm tur zat - 1,105
(i) Chawhmeh dawr - 449
(ii) Thingpui dawr - 15
(iii) Nepnawi dawr - 183
(iv) Thawmhnaw dawr - 206
(v) Secondhand dawr - 252
2. Parking: light vehicle 31 & two wheeler 79
3. Lift : veivahna tur leh bungraw thiar kualna tur
4. Cold storage
5. CCTV camera
6. ATM booth
7. Food court
8. Market office
9. Mini conference room