Lawngtlaiah Drug Free India Campaign hawng

Social Welfare minister Dr K Beichhua chuan nimin khan Lawngtlai College-ah Nasha Mukt Bharat Abhiyan 2.0 (Drug Free India Campaign) a hawng.

Dr K Beichhua chuan, mihringte ro hlu ber chu an fate an nih thu sawiin, "Kan ro hlute nasa taka min tihchhiatsaktu chu ruihhlo a ni. Ruihhloin kan ram nasa taka a tihchhiat mek hi kut kuangkuaha thlir mai thei kan ni lo a, kan zavaiin kan ṭan rual a ngai," a ti.

Ruihhlo laka Mizoram chhanchhuah hna chu hnam dangte thawh tur a ni lo tih sawiin K Beichhua chuan, college zirlaite chu an ṭhiante bulah nasa taka ruihhlo ṭhat lohzia zirtirtu ni tur leh a chhanchhuah hna thawk turin a sáwm a ni.

Social Welfare Minister chuan, ruihhlo vangin nasa takin Mizoramah HIV vei an pung tih sawiin, "India ram puma a punna rate aiin kan sang zawk. Hei vang hian sorkar, kohhran, pawl, khawtlang leh mimal angin kan ṭan rual a ngai tak zet a ni," a ti.

Inkhawmah hian Lawngtlai district-a zirna-in leh sorkar pisa zawng zawngah ruihhlo ti lo tur leh a tite chhanchhuah hna thawktu ni tura intiamna hun hman a ni a; Lai Autonomous District Council chief executive member V Zirsanga leh Lawngtlai bawrhsap Amol Srivastava te pawhin thu an sawi.

Drug Free India Campaign thawh khatna kalpuinaah India rama district 272 zingah Aizawl, Champhai leh Kolasib district-te thlan a ni a; a thawh hnihnaa district 100 thlan zingah Lunglei, Lawngtlai leh Mamit district-te an tel a ni.

Mizoram sorkar in ruihhlo do beihpui thlak tuma ruahmanna a kalpui mek chungchangah Dr K Beichhua hian nimin vêk khan Central Young Lai Association hruaitute a kawm a, kal zel dan turte inhrilhfiahna leh sorkar nena thawhho dan turte an sawiho.