Mother’s Kitchen Contest buatsaih

Women and Child Development department chuan nimin khan Lungleiah Poshan Maah (Nutrition Month) pualin Mother’s Kitchen Contest an buatsaih.

Intihsiakah hian thupui pathum - Promotion of Traditional Foods (Mizo chaw ṭha chi hrang hrang chawi lâr), Promotion of Tri Colour Thali (hnam puanzar rawng mila chaw leh chawhmeh siam) leh Budget Menu Competition (mi tin ban phak chaw ṭha siam dan menu hmanga intihsiak)-te a awm.

WCD district programme officer Dr Lalhruaitluangi Chhangte chuan, Mizo chaw leh chawhmeh hrang hrangte chu nu naupâi, naupawm leh naupang tan a ṭhat tâwk thu a sawi a, "Páwn lam chaw siam sa emaw, hnam dang chaw siam dante emaw aia a ṭhat loh bikna a awm lo. Kan ram ngeia thar thlai leh chawhmehte leh kan chhehvela kan hmuh theihte hi hriselna atana a ṭha tâwk a ni," a ti.

Mother’s Kitchen Contest-ah hian anganwadi worker-te'n Mizo chaw ṭha chi hrang hrang an siamte an pho chhuak a, an siam dan leh naupangte tana a ṭhatnate an sawifiah a ni.